Испания Қироллик футбол федерацияси (RFEF) «Бетис» яримҳимоячиси Факундо Бернални «Барселона» вингери Ламин Ямалга нисбатан қўпол ҳаракати учун тўртта учрашувга дисквалификация қилди.
Уругвайлик 23 ёшли футболчи Ла Лиганинг 9-туридан ўрин олган баҳсда рақибига боши билан зарба бергани учун майдондан четлатилган эди.
Бу жамоалар ўртасидаги беллашувда майдонда юзага келган тортишув вақтида Бернал Ямалнинг бўйнидан ушлаб, унинг юзига кетма-кет икки марта боши билан зарба берган. Бош ҳакам Рикардо де Бургос уругвайлик футболчига тўғридан тўғри қизил карточка кўрсатган. Ямал эса рақибини туртиб юборгани учун сариқ карточка билан жазоланган.
Испания футбол федерацияси интизом қўмитаси ушбу ҳолатни зўравонлик ҳаракати сифатида баҳолаб, регламентнинг 103.1-моддасига асосан Берналга тўртта ўйинлик дисквалификация тайинлади. Эндиликда у Ла Лига доирасида «Селта», «Малага» ва «Элче»га қарши, шунингдек, Испания кубоги доирасида «Навалкарнеро» билан баҳсни ўтказиб юборади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади