Сенегал ва Камерун миллий жамоаларининг собиқ бош мураббийи Клод ле Руа Африка футбол конфедерациясининг 2026 йилги Африка Кубоги финалида Марокашни ғолиб деб топиш ва финалда майдонни тарк этгани учун Сенегалга техник мағлубият ёзиш ҳақидаги қарорига муносабат билдирди.
«Африка футбол конфедерацияси бундай масхарабозликда шунчалик узоққа боради, деб тасаввур ҳам қила олмагандим. Мотсепе (Патрис Мотсепе, CAF раҳбари) бу федерацияни қандай бошқараётганини кўрсам… У — Жанни Инфантинонинг вассали, ФИФА президенти эса бошиданоқ ҳар қандай йўл билан бу Африка Миллатлар кубогини Марокашга беришни истаганди.
Марокаш яхши турнир ўтказди ва ғалабага муносиб эди, лекин финалда Сенегал кучлироқ бўлган. Икки ойдан кейин бундай қарорни эшитиш — қабул қилиб бўлмайдиган ҳолат. CAF кўп йиллардан бери турли қарорларни поймол қилиб келмоқда. Инфантино ўзини Африка футболи хўжайинидек тутади. У Африкада истаганини қилади. Менимча, Марокашни чемпион деб эълон қилиш учун кўплаб кўзбўямачиликлар бўлган. Бу билан ҳаммаси тугамайди.
CАF яратаётган образ — жуда ачинарли манзара. Менимча, апелляция комиссияси бўлади, кейин эса қарорга қараб иш CAS'гача (Спорт арбитраж суди) етиб боради. Бу қарор бутун футбол оламида кулгуга сабаб бўлади.
Марокашнинг баёноти демагогик жиҳатдан жуда заиф. Ҳакам қўллаши мумкин бўлган ягона жазо — майдонни тарк этган барча ўйинчиларга сариқ карточка кўрсатиш эди. Бир неча сония қолганди, олдиндан огоҳлантирилган икки нафар сенегаллик қизил карточка олиши мумкин эди. Мен «қоғоздаги» ғалаба қаердан пайдо бўлганини тушунмайман. Марокашнинг реакцияси шубҳали кўринади — улар нимага эришмоқчи экани тушунарсиз. CAF қабул қилган қарорлар туфайли ўзимни хафа ҳис қиляпман», — деди ле Руа L’Équipe du Soir эфирида.
