Сардор Баҳромов: «Бу ўйин финал олдидан финал бўлади»

Японияда ўтаётган Осиё ўйинларида футбол бўйича Ўзбекистон олимпия терма жамоаси чорак финалда Саудия Арабистонига ҳеч қандай имконият қолдирмасдан 3:0 ҳисобида тор-мор келтирганини биласиз.

Олдинда эса вакилларимизни ярим финал доирасида мезбон – Японияга қарши жиддий ўйин кутяпти. Бу ўйин Осака шаҳрида бўлиб ўтади ва жамоамиз аъзолари ушбу шаҳарга кўчиб ўтдилар. Ўйин эса 30 сентябр куни Тошкент вақти билан соат 15:30 да «Нагаи» стадионда бошланади.

Олимпия терма жамоамиз сафидаги етакчиларимиздан бири Сардор Баҳромов ҳам ўзига билдирилган ишончни оқлаб келмоқда ва у рақиб дарвозаларига чиройли голларни киритмоқда.

Ушбу футболчи яримфинал олдидан Tribuna.uz мухбирининг айрим саволларига жавоб қайтарди.

- Сардор, аввало чорак финал доирасидаги Саудия Арабистонига қарши ўтган ғалабали ўйиндан ҳиссиётлар қандай?

- Ассалому алайкум. Ғалабадан кейинги ҳиссиётлар ҳаммада ажойиб. Сабаби, икки турнирдан бери чорак финалда қолиб кетаётгандик. Шу сабабли ҳаммада кайфият зўр.

- Саудияга қарши ўйин олдидан рақиб ҳақида қандай маълумотга эга эдинглар ва ўйин сизлар кутгандек кечдими?

- Саудия терма жамоаси ҳақида ўрганиб чиққандик. Улар асосан стандарт вазиятлардан голлар уришган. Лекин биз билан учрашувда бу ўхшамади ва ўйинимиз биз хоҳлагандек тугади.

- Чорак финалдаги 3:0 ҳисобидаги ғалаба фонида терма жамоамиз қанчалик кучини кўрсатди, деб ўйлайсиз?

- Биз бор кучимиз билан ҳаракат қилдик ва йирик ҳисобда ғалаба қозондик.

- Энди ярим финалга тайёргарлик янада бошқача кечяптими ёки одатдаги кабими?

- Ярим финалдаги ўйинга янада яхшироқ тайёргарлик кўряпмиз. Сабаби, Япония Осиёда энг яхши жамоалардан бири. Бу ўйин финал олдидан финал бўлади, деб ўйлайман.

- Японияни ўйинини кўргандирсиз, бўлажак баҳсдан нима кутяпсиз?

- Япониянинг ўйинини кўрдик. Ҳар доим Япония кучли бўлиб келган. Улар билан ўйинда насиб бўлса, ғалаба қозониб, финалга чиқишимизни кутяпман.

- Терма жамоамизнинг асосий мақсади нима?

- Мақсадимиз битта: чемпион бўлиш. Турнир олдидан ҳам мақсад шу эди.