«Арсенал» ҳужумчиси Букайо Сака Чемпионлар лигаси 3-турида «Бавария»га қарши ўйинда (2:2) олган жароҳати сабабли олти-саккиз ҳафтага сафдан чиққан бўлиши мумкин. Бу ҳақда HandofArsenal нашри хабар берди.
«Арсенал» бош мураббийи Микел Артета эса футболчининг ҳолати бўйича якуний хулоса чиқаришга ҳали эрта эканини таъкидлади.
«Бугун тушдан кейин унга яна бир марта МРТ текшируви ўтказилади, чунки жароҳатланган жойда суюқлик кўп тўпланган. Якуний хулосага келишимиз учун яна бир нечта текширув ва мутахассисларнинг фикри керак. Шунинг учун аниқ жавоб беришдан олдин бироз кутишимиз лозим.
Футболчи майдонни тарк этишга мажбур бўлса, оғриқсиз юриши қийинлашса ва ҳаракатлари чекланса, бу, албатта, яхши белгилар эмас. Такрор айтаман, вазиятга аниқ баҳо бериш ва кейин сизларга маълумот бериш учун бироз кутишимиз керак», — дея Артетанинг сўзларидан келтиради клуб расмий сайти.
Шу тариқа, Саканинг майдонга қайтиш муддати қўшимча тиббий текширувлардан кейин маълум бўлади.
