«Рома» Эндрикни «Реал»дан ижарага олмоқчи

«Реал» ҳужумчиси Эндрик яна ижара асосида бошқа клубга ўтиши мумкин. Бу ҳақда журналист Экрем Конур хабар берди.

Манба маълумотига кўра, «Рома» клуби бразилиялик 19 ёшли футболчини ижарага олиш бўйича музокараларда фаол ҳаракат қилмоқда.
Таъкидланишича, римликларнинг асосий мақсади Эндрикни тўлиқ сотиб олиш эмас, балки ижара шартномаси асосида ўз сафига қўшиб олиш ҳисобланади.

Футболчи ўтган мавсумнинг иккинчи қисмини Франциянинг «Лион» клубида ижара асосида ўтказган эди.

Эслатиб ўтамиз, «Реал» Эндрикни 2024 йилда Бразилиянинг «Палмейрас» клубидан қарийб 50 миллион евро эвазига харид қилган.

Футболчининг «қаймоқранглилар» билан амалдаги шартномаси 2030 йилнинг июн ойигача амал қилади.