Испания миллий жамоаси сардори Родри ЖЧ-2026 финали олдидан ўзига бўлган ишончни сақлаб қолмоқда.
Маrcа хабарига кўра, яримҳимоячи бутун турнир давомида жамоадошларига бир хил гапни такрорлаб келмоқда.
«Мен бу ерга Жаҳон чемпионлигини қўлга киритиш учун келганман», — дейди Родри.
Франция устидан 2:0 ҳисобидаги ғалабадан сўнг Испания ўз тарихида иккинчи бор Жаҳон чемпионати финалига йўл олди. Энди жамоа иккинчи жаҳон чемпионлиги учун бир қадам нарида турибди.
Манбага кўра, Испания лагерида финал олдидан хотиржамлик ҳукм сурмоқда. Футболчилар ҳали олдиларига қўйилган вазифани бажармаганликларини яхши тушунишмоқда ва бор эътиборларини Аргентина билан бўладиган ҳал қилувчи баҳсга қаратишган.
Родри аввалроқ мундиалда чемпионликка эришиш осон бўлмаслигини ҳам таъкидлаганди.
«Кимдир Жаҳон чемпионлигини қийинчиликсиз қўлга киритамиз деб ўйлаётган бўлса, адашади. Бу ерда дунёнинг энг кучли миллий жамоалари жамланган. Аммо жамоамиз бундай турнирда ғалаба қозониш учун зарур бўлган етукликни намойиш этмоқда», — деди испаниялик футболчи.
Эслатиб ўтамиз, ЖЧ-2026 финалида Испания ва Аргентина миллий жамоалари 19 июл куни АҚШнинг Ист-Ратерфорд шаҳридаги «МеtLife» стадионида ўзаро баҳс олиб боради.
Мухлислар бу янгиликни Telegram’да муҳокама қилмоқда
Изоҳлар Telegram’да очилади