2026 йилги жаҳон чемпионати финалида Аргентина ва Испания миллий жамоалари ўзаро тўқнаш келади.
Бу икки жамоанинг жаҳон чемпионати плей-офф босқичидаги илк ўзаро тўқнашуви бўлади. Умуман олганда, миллий жамоалар иштирокидаги расмий турнирларда бу уларнинг иккинчи учрашувидир. Илк баҳс 1966 йилги жаҳон чемпионати гуруҳ босқичида ўтказилган ва унда Аргентина 2:1 ҳисобида ғалаба қозонган.
Бундан ташқари, икки жамоа ўзаро 13 та ўртоқлик учрашувида майдонга тушган. Уларда Испания 6 марта, Аргентина 5 марта ғалаба қозонган, яна икки ўйин дуранг билан якунланган.
Қайд этиш лозим, шу йил март ойида Аргентина ва Испания Америка кубоги ҳамда Европа чемпионати ғолиблари ўртасида ўтказиладиган Финалиссима баҳсида ўзаро тўқнашиши керак эди. Бироқ учрашув кейинчалик бекор қилинди.
Маълумот ўрнида, аргентиналиклар яримфиналда Англияни 2:1 ҳисобида мағлуб этган бўлса, испанияликлар Францияни 2:0 ҳисобида енгди.
2026 йилги жаҳон чемпионати финали Ню-Йорк шаҳрида бўлиб ўтади. Ўйин 19 июлдан 20 июлга ўтар кечаси Тошкент вақти билан соат 00:00 да бошланади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади