Мадриднинг «Реал» клуби афсонаси Серхио Рамоснинг «Севиля»ни сотиб олиш режаси амалга ошмайдиган бўлди.
El Desmarque хабарига кўра, Андалусия клуби Рамос ва унинг инвесторлар гуруҳи билан музокараларни расман тўхтатган.
Қайд этилишича, икки ҳафта олдин томонлар 440 миллион евролик келишув бўйича дастлабки ҳужжатни имзолаган эди.
Дастлабки режа бўйича 80 миллион евро клуб капиталини оширишга, 290 миллион евро акциядорларга, қолган маблағ эса клуб қарзларини ёпишга йўналтирилиши керак эди.
Бироқ чоршанба кунги учрашувда Рамос томони янги таклиф билан чиққан.
Янги инвесторлар гуруҳи клуб қийматини деярли икки баравар камайтириб, умумий суммани 220 миллион еврога туширган.
Янги схемага кўра 120 миллион евро капитал ошириш учун ажратилади, эвазига инвесторлар клубнинг 42 фоиз назорат пакетини қўлга киритади, яна 100 миллион евро орқали қўшимча 18 фоиз акция сотиб олинади.
Бу эса амалдаги акциядорлар улушининг деярли қадрсизланишига олиб келиши мумкин эди.
Натижада «Севиля» раҳбарияти таклифни қабул қилмаган ва музокараларни тўлиқ якунлаган.
Манбага кўра, беш ой давом этган музокаралар шу тариқа муваффақиятсиз тугаган.
