«ПСЖ» президенти Носсир Ал Хилайфий Бредли Барколанинг келажаги ҳақида фикр билдирди. Франциялик футболчига «Ливерпул» ва «Арсенал» клублари қизиқиш билдирмоқда.
Ал Хилайфий 23 ёшли вингер атрофидаги трансфер миш-мишларига хотиржам муносабатда эканини таъкидлади.
«Биз хотиржам ишлаяпмиз. Кўп гапирмаймиз, ишларни амалга оширамиз. Барча футболчиларимиз биз учун муҳим. Улар «ПСЖ» билан шартнома имзолаганидан сўнг, клуб учун муҳим футболчига айланади», — деди Ал Хилайфий.
Президентдан Баркола трансфер ойнаси ёпилгач ҳам «ПСЖ» футболчиси бўлиб қоладими, деб сўралганида эса у аниқ жавоб бермади.
«Бугун бу ҳақда ҳеч нарса дея олмайман. Бугун айтишим мумкин бўлган нарса — у «ПСЖ» футболчиси», — деди клуб раҳбари.
Барколанинг «ПСЖ» билан амалдаги шартномаси 2028 йилгача мўлжалланган. Манбага кўра, футболчи шартномасини узайтириш таклифини қабул қилишга шошилмаяпти.
Маълумот учун, Баркола 2023 йилда «Лион»дан «ПСЖ»га ўтган. У Париж клуби сафида 152 та баҳсда 39 та гол уриб, 37 та голли узатмани амалга оширган.
