АҚШ миллий жамоаси бош мураббийи Маурисио Почеттино 2026 йилги жаҳон чемпионати 1/8 финал босқичи доирасидаги Белгияга қарши баҳс (1:4)дан сўнг ўз фикрлари билан ўртоқлашди.
«Ҳамма кўрди, биз ўйинга бошиданоқ кириша олмадик. Бу баҳсда гўё майдонда йўқ эдик. Ҳа, ҳисобни 1:1 кўринишига келтирдик, аммо кейинги ҳужумнинг ўзидаёқ яна гол ўтказиб юбордик.
Белгия миллий жамоасини табриклайман, улар биздан кучлироқ эдилар. Бу кун бизники эмас эди. Баҳона излашнинг ҳожати йўқ, чунки жамоамиз кўрсатишга қодир бўлган ўйин савиясини намойиш эта олмадик. Бу — ҳақиқат.
Биз ўрганишимиз керак. Бу таҳлил қилиш, сабоқ чиқариш ва нима учун бу ўйинга жаҳон чемпионатидаги аввалги баҳслардагидек тайёрлана олмаганимизни англаш жараёнидир.
Бунинг сабаблари турлича бўлиши мумкин. Балки жавоб жуда оддийдир: бу кун на жамоавий, на якка тартибда бизники бўлмади. Бунинг учун масъулиятни ўз зиммамга оламан.
Биз вазиятни чуқур таҳлил қилишимиз ва бу бизнинг одатдаги ўйинимиз ҳам, услубимиз ҳам эмаслигини тушуниб олишимиз лозим», — деди Почеттино.
