«Барселона» клуби собиқ футболчиси Жерар Пике қанот ҳимоячиси Марк Кукурелянинг Мадриднинг «Реал» жамоаси сафига ўтиши ҳақида фикрларини билдирди.
Эслатиб ўтамиз, 27 ёшли футболчи «кўк-анорранглилар» академияси битирувчиси бўлиб, у 2020 йилгача жамоа тизимида тўп тепган.
«Кукуреля «Ла Масия»дан ўтган. У болалигидан «Барселона» эмблемаси туширилган футболкаларда ҳаракат қилган, клубнинг қадриятларини ўзлаштирган ва «Барса»нинг бутун дунё бўйлаб миллионлаб мухлислари учун нимани англатишини аниқ билган. Шунинг учун бу [«Реал»га ўтиш] янада оғирроқ. «Ла Масия»да катта бўлган ўйинчи бу рақобатни бошқаларга қараганда яхшироқ тушунади. Агар сиз «Барселона» ёшлар академиясида ўсган бўлсангиз ва кейин «Реал» Мадридни танласангиз, «Барселона» мухлислари хурсанд бўлишидан умид қилманг.
«Ла Масия» — бу шунчаки футбол академияси эмас: бу бир ўзига хослик. «Барселона»дан кетиш мумкин, лекин сизни «Ла Масия» тарбиялаганидан кейин «Реал» Мадридга ўтиш мумкинми? Кўплаб мухлислар учун бу аллақачон чидаб бўлмас вазият. Одамлар ўз қарорларини қабул қилишлари мумкин, лекин ҳақиқий «Барса» мухлиси ўзининг қаердан келиб чиққанини унутмайди», - дея Пикенинг сўзларини келтиради Defensa Central.
