79 ёшли функционер Флорентино Перес «Реал» президентлиги учун сайловида ғалаба қозонгач, португалиялик мутахассис Жозе Моуринионинг бош мураббий этиб тайинлангани ҳақида баёнот берди.
«Биз дунёдаги энг яхши мураббийлардан бири, ҳақиқий мадридистни яна қарши олишдан фахрланамиз. Кутиб олинг, Жозе Моуринио…», — деди Перес.
Перес сайловда испаниялик бизнесмен Энрике Рикелмени ортда қолдирди ва клубни 2030 йилгача бошқаришда давом этади. Функционер ушбу лавозимни қаторасига 8-марта эгалламоқда.
Эслатиб ўтамиз, Моуринио аввал ҳам «Реал»да 2010-2013 йиллар оралиғида ишлаган. Унинг қўл остида жамоа Испания чемпионати, кубоги ва суперкубогини қўлга киритган.
