«Бавария» дарвозабони Мануел Нойер оёқ пайининг қисман узилиши сабаб узоқ муддатга сафдан чиқди. Журналист Патрик Штрассернинг хабар беришича, 40 ёшли посбон машғулотларга қайтиши учун 6 ҳафтадан 12 ҳафтагача вақт керак бўлади.
Энг қулай сценарий бўйича Нойер январ ойида сафга қайтиши мумкин. Бироқ унинг тикланиш жараёни февралгача чўзилиши эҳтимоли ҳам бор. Фабрицио Романо ҳам дарвозабоннинг ўнг оёғидаги пайдан қисман жароҳат олганини тасдиқлади. «Бавария» ҳам футболчининг жароҳати ҳақида маълумот берган.
Маълумот учун, Нойер Германия чемпионати доирасида «Майнц»га қарши баҳсда жароҳат олган. У ушбу мавсум Бундеслигада бешта ўйинда майдонга тушиб, учта гол ўтказиб юборган.
Эслатиб ўтамиз, германиялик дарвозабоннинг «Бавария» билан амалдаги шартномаси 2027 йил 30 июнига қадар мўлжалланган.
