«Монако» яримҳимоячи Магнес Аклиушнинг трансфери бўйича «ПСЖ» томонидан юборилган учинчи таклифни ҳам қабул қилмади. Бу ҳақда Onze Mondial хабар берди.
Манбага кўра, монегасклар 23 ёшли футболчи учун 50 миллион евро талаб қилмоқда. «ПСЖ»нинг сўнгги таклифи миқдори очиқланмаган, бироқ клублар келишувга ҳар қачонгидан ҳам яқинроқ экани таъкидланган.
Шу билан бирга, Аклиуш аллақачон Париж клуби билан шахсий шартнома шартлари бўйича келишувга эришган. Футболчининг ўзи Франция чемпионлари сафига қўшилишни истамоқда.
Аклиуш «Монако» академияси тарбияланувчиси ҳисобланади ва 2022 йил ёзидан буён асосий жамоа шарафини ҳимоя қилиб келмоқда.
Ўтган мавсумда у барча турнирлар доирасида 43 та учрашувда иштирок этиб, 7 та гол урди ва 11 та голли узатмани амалга оширди. Унинг «Монако» билан амалдаги шартномаси 2028 йилнинг ёзига қадар мўлжалланган.
