Мадриднинг «Атлетико» клуби ҳимоячиси Науэль Молина фаолиятини «Рома»да давом эттиради. Бу ҳақда журналист Маттео Моретто хабар берди.
Манбага кўра, аргентиналик 28 ёшли футболчи Рим клуби билан шахсий шартнома шартларини келишиб олган. Томонлар ўртасидаги келишув тўрт йилга мўлжалланган.
Трансфер бўйича расмий эълон яқин вақт ичида амалга оширилиши мумкин. Аввалроқ матбуотда «Рома» Молинанинг трансфери учун «Атлетико»га тахминан 18 миллион евро тўлаши ҳақида маълумотлар тарқалган эди.
Молина «матрасчилар» сафида 2022 йил ёзидан буён ҳаракат қилиб келмоқда. Унгача аргентиналик ҳимоячи Италия чемпионатида тажриба орттирган — Молина икки мавсум давомида «Удинезе» шарафини ҳимоя қилган.
