Жаҳонгир Ўрозов: «Рубин» аниқ таклиф билан чиқди ва улар охиригача туришди»

Хабарингиз бор, яқинда Қозоннинг «Рубин» клуби ўзбек футболчиси, ҳамюртимиз Жаҳонгир Ўрозов билан шартнома имзолади. Бунга қадар Самарқанднинг «Динамо»сида фаолият олиб борган ҳимоячи яқинда бўлиб ўтган жаҳон чемпионатида Ўзбекистон миллий жамоаси сафида иштирок этди. Айнан шундан сўнг Ўрозовга четдан таклифлар кўпая бошлади ва якунда «Рубин» варианти танланди.

Легионерга айланган Жаҳонгир Ўрозов янги жамоасининг янги аъзоси сифатида у ердаги фаолиятини бошлади.

Одатга кўра, Tribuna.uz нашри легионерга айланган футболчимиз билан биринчи бўлиб суҳбат уюштирди.

- Жаҳон чемпионатига борган Жаҳонгир Ўрозов билан «Рубин»га ўтган Жаҳонгир Ўрозов ўртасида қандай фарқ бор? ЖЧдан кейин сизда нимадир ўзгардими?

- Авваламбор, Ассалому алайкум! Саволингизга келадиган бўлсак, ҳеч қандай фарқи йўқ.

- Жаҳон чемпионатидан кейин Европадан таклифлар бўлганини айтгандингиз. Ўша таклифлар орасида қайси клуб ёки чемпионат сизга энг қизиқ туюлди?

- Таклиф кўп эди. Аниқ таклиф билан чиққан жамоа охиригача аниқ таклифида тургани «Рубин» бўлди ва бу чақирувни қабул қилдим.

- Агар Европа вариантлари бўлган бўлса, нега айнан «Рубин»ни танладингиз? Қарорингизда ҳал қилувчи омил нима бўлди?

- Айтиб ўтганимдек, «Рубин»нинг таклифи аниқ эди.

- Аввалига «Рубин» варианти бўйича турли гаплар бўлди, кейин эса барибир Қозон клубини танладингиз. Қарорингизни ўзгартиришга нима сабаб бўлди?

- Европани кучли чемпионатидан таклиф кутдим. Сабаби, агентларим шошилмасликни айтишди. Шунинг учун «Рубин» билан музокарамизни тўхтатиб тургандик.

- Очиқ айтайлик: «Рубин» сиз учун Европага олиб борувчи кўприкми ёки Қозон клубида узоқ муддат қолиб, ўзингизни кўрсатишни истаяпсизми?

- «Рубин» жамоаси ҳам ўз ўрнига эга кучли клуб. Бу ердан кўплаб футболчилар хорижга йўл олишмоқда. Албатта, мен учун ҳам кўприк вазифасини ўтайди, деб ўйлайман.

- «Рубин»да сизга ишонч билдириляпти. Бу сизга қўшимча босим берадими? «Бу ерда ўзимни албатта исботлашим керак», деган фикр борми?

- Аксинча, босим бўлмайди. Жамоа жуда ҳам аҳил экан. Бу ўз ўйинимни исботлашим учун яхши имконият.

- Жаҳон чемпионатидаги ўйинларингиздан кейин ўзингизга баҳо берсангиз, қайси жиҳатингиз Россия даражаси учун тайёр, қайси томонингиз ҳали устида ишлашни талаб қилади?

- Футболчи ҳар доим ўз устида ишласа муваффақият ёнма-ён юради, қайси чемпионатда бўлишидан қатъий назар ўзингизга ишонасиз.

- «Динамо»ни тарк этишингиз қандай бўлди? Бу борада сизга энг оғири нима эди?

- «Динамо» яхши жамоа, мураббий ҳам яхши. Лекин муҳитни ўзгартиришим, кучли чемпионатда ўйнашим керак эди. «Динамо»даги барчага раҳмат айтаман.

- «Рубин» бош мураббийи билан учрашдингизми? Суҳбат қандай ўтди?

- Жамоа билан машғулотларда қатнашяпман. Барчаси кўнгилдагидек.

- Туркиядаги аввалги хорижий тажрибангиздан кейин энди яна легионерга айландингиз. Ўша даврдан кейин қандай хулоса чиқардингиз?

- Албатта, мухлислар «Рубин»да яхши иштирокимни кўришади, Худо хоҳласа.

- «Динамо»да сизга ишонч билдирилди, миллий жамоа билан жаҳон чемпионатига бордингиз. Энди «Рубин»да ишончни нолдан қозонишингиз керак. Бу фаолиятингиздаги энг қийин босқич бўладими?

- Албатта, осон бўлмайди, янги чемпионат. Аммо ўзимга ишонмасам хорижда тўп суриш учун келмас эдим.

- Жаҳон чемпионатида майдонга биринчи бор тушган пайтингизда хаёлингиздан биринчи нима ўтди? Ўша лаҳзада «мен катта футболга келдим», деган ҳис бўлдими?

- Миллий жамоадаги босим ҳар бир футболчида бўлиши мумкин. Лекин Ватан шаъни турганда ҳаяжон бўлиши мумкин эмас.

-. Бугун Ўзбекистон футболчиси сифатида «Рубин»дасиз. Сизга фақат ўзингизни эмас, балки ўзбек футболчиларининг даражасини ҳам кўрсатиш масъулияти юкланганини ҳис қиляпсизми?

- Албатта, ҳис қиламан. Ўзбек футболчилари бундан-да кучли чемпионатда ўйнай олади ва ўйнаб юришибди ҳам. Хавотир олмасангиз бўлади, майдонга тушганда ҳар доим масъулиятни ҳис қиламан.

- Янги клубда қайси рақамни танладингиз?

- 13-рақам.