Миржалол Қосимов: «Энди йигитларга эътироз билдира олмайман»

ОКМК клуби бу турда «Сурхон» билан тўқнаш келди. Ўйиннинг кўп қисмида бир футболчи кўп бўлиб ҳаракат қилган олмаликлиқлар бу устунликдан натижа бўйича фойдалана олмадилар. Учрашувда ҳисоб очилмади ва жамоалар бир очкодан бўлишиб олдилар.

Ўйиндан сўнг ОКМК бош мураббийи Миржалол Қосимов матбуот анжуманида қуйидаги фикрларни айтди:

- Фикрлар, бу учинчи ўйинки, гол ура олмаяпмиз, бош қотиб ётибди, вазиятларимиз бор, лекин ўшани амалда айтаман-у, вазиятга очко бермайди. Урилган голга очко бериши мумкин. «Сурхон» жамоаси яхши ҳимояланди, ўйиннинг бошида ҳам дарвозабони қутқарди. Кейин иккита вазият бўлди, шулардан унумли фойдаланиб якунлаш керак эди-да. Футболда гол урмасанг — шу. Ҳозир бошимиз қотяпти. Энди йигитларга эътироз билдира олмайман. Борини бериб ҳаракат қилиб, охиригача курашиб, керак бўлса, ўша комбинацион ўйинларни, талабимизни бажаришяпти-ю, лекин дарвозага гол уриш оқсаяпти. Нима деймиз, кўриб чиқиш керак, бошқа иложимиз йўқ.

«Сурхон» ҳам яхши ҳаракат қилди. Ҳадеб ҳужумда ўйнайверганда ҳам қарши ҳужумда уриб кетиши мумкин эди. Ундан олдинги учрашувларда ҳам худди шунақа бўлган эди. Ишлаймиз, бошқа иложи йўқ. Бу энг кераклиси — ўша шижоат. Ўйлайманки, буни ҳам барибир ният қиламанки, мукофоти бўлса керак. Ўз-ўзидан бу нарса мукофотсиз қолиб кетади, деб ўйламайман. Барибир бунинг ҳам бир ҳикмати бордир.

Учта ўйинда 15 тача имконият бўлди-да. Суперлигада бунақа шароит яратиш... Бир хил пайтларда 90 дақиқа ўйнаб, битта ҳам вазият бўлмаслиги мумкин-да. Учта ўйинда, менимча, ҳозир саноғига ҳам етолмаяпман. Жуда ҳам кўп вазиятлар яратяпмиз-да. лекин ўша нарса — охиригача етадиган вазият... Учта учрашувдан бери гол уролмаяпмиз-да. Йигитларга айтарман, туя сўйиб юборишар», - дея бош мураббийнинг сўзларини келтиради Tribuna.uz журналисти.