Анвар Ғофуров: «Кимга қарши ўйнаётганимизни яхши билардик»

«Сурхон» клуби ОКМКга қарши баҳс олиб борди ва учрашувда ҳисоб очилмади – 0:0. Бу айниқса, термизликлар учун ижобий натижа. Боиси, 17-дақиқада «Сурхон» футболчиси майдондан четлатилди. Шунга қарамай, бир футболчи кам бўлиб қолган жамоа ОКМКдан очко тортиб олди.

«Сурхон» бош мураббийи Анвар Ғофуров матбуот анжуманида фикрлари билан ўртоқлашди.

— Ассалому алайкум. Аниқ билгандик, бу яхши шаклланган жамоа, яхши футболчиларга, яхши мураббийлар штабига эга. Ўзига яраша ўйин структураси бор. Яхши футбол ўйнашади, қувноқ футбол дейишади бунақа стилни, ҳужумкор ўйнашади. Бу ажойиб жамоа, шуни тан олган ҳолда майдонга тушгандик. Билгандик кимга қарши ўйнаяпмиз ва бизга ҳар битта ўйинда очколар керак. Футболчиларга аниқроқ тушунтиряпмиз. Ўйлайманки, кўп ўйинларда биз натижада ютқазаётган бўлсак ҳам, лекин ўйин борасида биз ютқазмаяпмиз. Албатта, бу яхши, ижобий, аммо натижа ҳам бўлиши керак. Албатта, биз натижага ҳам келамиз. Бугунги ўйин осон эмас эди. Болаларга катта раҳмат, катта меҳнат қилишди. Термиздан келган мухлисларга алоҳида катта раҳмат. Биз уларни эшитдик, бизни «поддержка» қилишди. Менимча, футболчиларга бу далда бўлди, борини бериб ҳаракат қилишди ва яхши ўйин кўрсатишди деб ўйлайман. Учрашув бошида қизил карточка ўз сўзини айтди, албатта. Буни билинтирмасликка ҳаракат қилишди. Жуда яхши ҳолат, бунақа муҳит бўлганидан мен хурсандман, жамоамизда, бу жуда яхши.

- 17-дақиқадаги қизил карточкадан кейин футболчиларингизни қандай руҳлантирдингиз? Барибир қизил карточка барвақт бўлганди.

- Албатта, мен ҳар битта футболчига ишонаман, аниқ. У майдондами, майдондан ташқаридами ёки йигирматаликка тушмаган бўлса ҳам, ҳар битта футболчига ишонаман. Майдонга тушган ҳар битта футболчи, мен аниқ биламан, у вазифани бажаради ва борини беришга тайёр. Ҳа, бизда ўзига яраша муаммолар бор, бунга қарамасдан биз ўзимизнинг ишимизни қилишимиз керак.

- Бугун устозга қарши жамоани олиб чиқдингиз. Кейинги тур чемпионатда ўша «Бунёдкор»га қарши. Қанақа ўйин кутяпсиз?

- Бизда Кубок ўйини бор, ҳали ва чемпионатда нима бўлади? Албатта, энди бу – футбол. Агар кимдир олдиндан билса, у ҳар доим жаҳон чемпиони бўларди. Шунинг учун ҳар сафар ҳар хил жамоа чемпион бўляптими, демак, ҳамма ишлаши керак. Тайёргарлик бўлиши лозим, ҳар битта ўйинга. Албатта, қизиқарли ўйин бўлади деб ўйлайман. Кўрамиз.

- Қачон Термиздаги стадионга қайтасизлар?

- Ўша «Пахтакор» ҳам қанча пул сарфлаб ва имкониятга эга бўлиб туриб, майдони мана шунақа ҳолатга келди. Бизда ўзига яраша, энди барибир тушунасиз, муаммо бор ва у даражада сарф қилолмаймиз, балким. Ҳозирги кунда у майсага... У майса ҳам муҳтож. Унга қарашиш ва дори-дармон бериш учун вақтида бўлиши керак ва буни инобатга олишимиз керак – иқлим. Термиз – энг иссиқ жой. Шу сабабли бу ерда майдонни назорат қилиш жуда қийин. Мен билмадим, қанақа мутахассислар керак. Балким Термизга бошқача мутахассислар керакдир, температура баландроқда ўша ўтни керакли даражада ушлаб туриш учун. Лекин Ўзбекистонда исталган жойни олайлик, харитада энг иссиқ жой – Термиз, бу аниқ. Буни ҳам ўзига яраша қийинчиликлари бор. Раҳбарлар ҳаракат қилишяпти, аммо, барибир қийин нарса. Агар бу осон бўлганда, ўша имконияти бор жамоаларда ҳам шунақа бўляпти. Биз ҳам уйимизда минглаб мухлисларимиз қўллаб-қувватлови остида ўйнашни хоҳлаймиз. Биз буни хоҳламаймиз деб ўйлайсизларми? Албатта, биз ҳам истаймиз. Лекин ҳозир вазиятга тўғри баҳо беришимиз керак ва яна қайтариб ўтаман, ўзимизнинг ишимизни қилишимиз керак», - дея бош мураббийнинг сўзларини келтиради Tribuna.uz мухбири.