«Милан» раҳбарияти Адриен Рабио билан узоқ муддатли шартнома имзолашни режалаштирмоқда. Derbyderbyderby.it хабарига кўра, италиялик клуб франциялик яримҳимоячига келишувни 2030 йил июнигача узайтиришни таклиф қилган.
Таклиф этилаётган шартларга кўра, футболчининг йиллик маоши 3,5 миллион евродан 5,5 миллион еврога ошади. Шунингдек, шартномада қўшимча бонуслар ҳам кўзда тутилган.
«Милан» шу тариқа жамоанинг асосий футболчиларини узоқ муддатга сақлаб қолмоқчи. Рабио клуб учун муҳим ижрочилардан бири сифатида баҳоланмоқда.
Маълумот учун, Адриен Рабио 2025 йил ёзидан буён «Милан» шарафини ҳимоя қилмоқда. Бунгача у бир неча йил давомида «Ювентус» сафида тўп тепган ва А Сериянинг самарали яримҳимоячиларидан бири сифатида танилган.
Эслатиб ўтамиз, Рабио Франция миллий жамоаси сафида ҳам мунтазам иштирок этиб келади.
