«Арсенал» вингери Габриел Мартинелли фаолиятини Саудия Арабистонида давом эттириши мумкин. Бу ҳақда The Athletic хабар берди.
Манбага кўра, «Ал Ҳилол» Лондон клуби ва 25 ёшли бразилиялик футболчи вакиллари билан музокаралар олиб бормоқда. «Арсенал» Мартинелли трансферидан тахминан 60 миллион евро ишлаб олишни истамоқда. Футболчининг ўзи эса Саудия клубига ўтишга тайёр.
Аввалроқ Мартинелли «Галатасарой» вариантини рад этганди. Туркия клуби бразилиялик вингер учун 45 миллион евро таклиф қилган эди.
Маълумот учун, Мартинелли ўтган мавсум барча турнирларда 53 та учрашувда майдонга тушиб, 11 та гол ва 7 та голли узатмага муаллифлик қилган. У «Арсенал»га Англия чемпионлигини қўлга киритиш ва Чемпионлар лигаси финалига чиқишда ёрдам берган.
ЖЧ-2026да эса бразилиялик футболчи 4 та учрашувда 1 та гол урган.
Эслатиб ўтамиз, «Арсенал» аввалроқ Мартинеллини «Галатасарой»га сотиш имкониятини кўриб чиққан, бироқ футболчи Туркияга кўчиб ўтишни истамаганди.
