«Ковентри Сити» бош мураббийи Френк Лемпард «Челси»даги мураббийлик ўрни билан боғлиқ гап-сўзларга изоҳ берди. Эслатиб ўтамиз, лондонликлар Лиам Росениорни истеъфога чиқаргач, Лемпард номи асосий номзодлар қаторида тилга олинаётганди.
47 ёшли мутахассис бу борадаги саволларга жавобан ҳозирги жамоасига содиқ эканини таъкидлади.
«Мен Лиам ва «Челси» ҳақида гапиришни истамайман. Бу ҳолатларни яхши тушунаман ва бош мураббийлар ҳақида шошма-шошарлик билан фикр билдириш тўғри эмас. Мен ҳозир «Ковентри» мураббийиман, жамоа билан чемпионликни қўлга киритдик ва Премер-лигага чиқдик — айни дамда фақат шу ҳақида ўйлаяпман», — деди Лемпард.
Шунингдек, у «Челси» учун қийин давр бўлаётганини ҳам тан олди, бироқ бу клубнинг ички масаласи эканини қайд этди.
«Бу футбол, қийин даврлар бўлиб туради. Аммо бу «Челси»нинг ички иши. Ҳозир менинг ишим — «Ковентри», — дея қўшимча қилди мутахассис.
Маълумот учун, Лемпард «Ковентри» билан Чемпионшипда ғолиб чиқиб, жамоани 25 йиллик танаффусдан сўнг яна Премер-лигага олиб чиқди. Унинг клуб билан шартномаси 2027 йилгача амал қилади.
