«Барселона» яримҳимоячиси Фермин Лопес ЖЧ-2026ни ўтказиб юборади. Бу ҳақда клуб расмий сайти хабар берди.
Испаниялик 23 ёшли футболчи Ла Лига 37-турида «Бетис»га қарши баҳсда жароҳат олиб, танаффус вақтида захирага олинганди.
Тиббий кўрикларга кўра, футболчининг ўнг оёқ бешинчи кафт усти суяги сингани аниқланган. Тез орада Лопес жарроҳлик амалиётини ўтказади.
Дастлабки тахминларга кўра, Фермин камида икки ойга яқин муддатни майдондан ташқарида ўтказишга мажбур бўлади.
Испания миллий жамоаси эса яқин орада мундиал учун якуний рўйхатни эълон қилади.
