Бир қатор Европа футбол федерациялари ФИФА президенти Жанни Инфантинога қарши кучли номзод қўллаб-қувватлашга тайёр. Бу ҳақда talkSPORT хабар берди.
Манбага кўра, Инфантино учинчи муддатга қайта сайланиш ниятида ва дастлаб сайловда рақибсиз қатнашишни режалаштирганди. Бироқ УEФА ичида унга муқобил номзод кўрсатиш тарафдорлари пайдо бўлган.
Эҳтимолий номзодлардан бири сифатида УEФА президенти Александер Чеферин тилга олинмоқда. Аммо манбанинг ёзишича, словениялик функционер ҳозирча Инфантинога қарши курашмоқчи эмас ва эътиборини УEФАдаги фаолиятига қаратган.
Шунингдек, Белгия ва Полша футбол федерациялари «ПСЖ» президенти ҳамда Европа клублари ассоциацияси раҳбари Носир Ал-Хелайфини қўллаб-қувватлашга тайёр. Бироқ унинг ўзи ҳозирча сайловда иштирок этишга қизиқиш билдирмаган.
Номзодлар орасида «Легия» клуби эгаси Дариуш Мёдуски, КОНКАКАФ президенти Виктор Монтаглиани ва Африка футбол конфедерацияси раҳбари Патрис Мотсепе ҳам тилга олинмоқда.
Қайд этилишича, УEФАдаги норозиликка Инфантинонинг Жаҳон чемпионати иштирокчилари сонини 64 та жамоага етказиш, шунингдек, Клублар ўртасидаги жаҳон чемпионатини кенгайтириш ва уни ҳар икки йилда бир марта ўтказиш режалари сабаб бўлган.
ФИФА президентлиги сайлови учун номзодларни рўйхатга олиш 18 ноябр куни якунланади. Овоз бериш ҳам айнан шу санада бўлиб ўтади.
