«Эвертон» «Монако» билан ҳужумчи Фоларин Балогуннинг трансфери бўйича келишувга эришди. Бу ҳақда журналист Фабрицио Романо хабар берди.
Англия клуби америкалик форвард учун 45 миллион евро тўлайди. Яна 5 миллион евро бонуслар сифатида кўзда тутилган.
Шунингдек, «Монако» футболчининг келгусидаги эҳтимолий сотувидан маълум фоизга эга бўлади. Францияликлар трансферга розилик берган. Энди «Эвертон» Балогун билан шахсий шартнома шартларини келишиб олиши керак.
Маълумот ўрнида, Балогун 2023 йил август ойидан буён «Монако»да ўйнаб келмоқда. У Франция клубига «Арсенал»дан кўчиб ўтганди.
Ўтган мавсум форвард барча турнирларда 43 та ўйинда иштирок этиб, 19 та гол урди ва 4 та ассист амалга оширди. Аввалроқ «Монако» Балогун учун 60 миллион евро сўраётгани маълум қилинганди.
