«ПСЖ» бош мураббийи Луис Энрике парижликлар сафидаги фаолияти, Парижга мослашиши ва ўзини ҳақиқий парижлик деб ҳисоблаши ҳақида гапириб ўтди.
«Умид қиламанки, умримнинг охиригача Париж билан боғлиқ бўлиб қоламан. Мен шартномамни узайтирдим ва энди «ПСЖ» билан яна кўплаб совринларни қўлга киритишга тайёр эканимни исботлаш учун ўзимни янада кўпроқ босим остида ҳис қиляпман.
Одамлар менга жамоадан жуда мамнун эканини айтаётгани учунгина хотиржамроқ бўлиб қолганим йўқ.
Парижликлар кўпинча менга: «Сиз ҳаётимизни ўзгартирдингиз», дейишади. Ҳаётда бундан ҳам муҳимроқ нарсалар бор.
Мураббий учун ўз меҳнати одамларга нимадир бера олганини англаш, улар ва оилалари билан шундай кучли ҳис-туйғуларни баҳам кўриш жуда қадрли.
Ўзимни ҳақиқий парижлик деб ҳисоблайманми? Умид қиламан! Лекин француз тилимни ҳали анча яхшилашим керак (кулади).
Дастлабки йилларда бу тилда гапиришга ҳаракат қилганимда, мен учун жуда қийин бўлган. Баъзан ўзимни берк кўчага кириб қолгандек ҳис қилардим. Бироқ ривожланяпман ва кун сайин ўзимни тобора эркинроқ ҳис қиляпман.
Менимча, Париж ва Франция клуби учун муҳим бўлган қадриятларни етказиш ҳамда унинг маданиятини қўллаб-қувватлаш муҳим.
Мен хорижликман, аммо Париж билан боғлиқ бўлиб қолишни истайман ва умримнинг охиригача шу шаҳар билан алоқам узилмаслигига умид қиламан», — дея Энрикенинг сўзларини келтиради Paris No Limit саҳифаси.
Эслатиб ўтамиз, испаниялик мутахассис 2023 йил ёзидан буён Париж жамоасини бошқариб келмоқда. У бошчилигида «ПСЖ» икки марта Чемпионлар Лигаси (2024/2025 ва 2025/2026 йилги мавсумлар) ҳамда UEFA Суперкубогида ғолиб чиқди.
Шунингдек, жамоа уч марта Франция чемпиони бўлди (2023/2024, 2024/2025 ва 2025/2026) ва мамлакат Суперкубогини қўлга киритди.
Бундан ташқари, «ПСЖ» икки марта Франция кубогида (2023/2024 ва 2024/2025) ғолиб чиқди ҳамда 2025 йилда FIFA Қитъалараро кубогини қўлга киритди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади