Десайи «Реал»га Винисиус билан хайрлашишни тавсия қилди

Франция миллий жамоаси собиқ ҳимоячиси Марсел Десайи «Реал» бразилиялик вингер Винисиус Жуниор билан хайрлашиши керак деб ҳисоблайди.

Десайининг фикрича, Килиан Мбаппе ва Винисиусдан иборат ҳужум чизиғи кутилган натижани бермаяпти. Шу сабабли мураббийлар штаби бошқа вариантларни кўриб чиқиши лозим.

«Менимча, «Реал» Винисиусни қўйиб юбориши керак эди. Улар бошқа футболчиларни излаши лозим. Биз яна Килиан Мбаппе ва Винисиус жуфтлиги масаласига қайтамиз. Бу жуфтлик ўзини оқламади.

Шунинг учун таҳлилчи сифатида шахсий фикримни айтсам, Винисиус учун жамоани тарк этиш яхшироқ бўларди. Энди у ўзига нисбатан билдирилаётган салбий муносабат ва танқидлардан қутула оладими-йўқми, буни кўрамиз», — деди Десайи beIN Sports'га берган интервюсида.

Маълумот ўрнида, ушбу мавсумда Винисиус «Реал» сафида 10 та учрашувда майдонга тушиб, битта гол урди. У Ла Лиганинг ўтган турида «Вилярреал»га қарши баҳсда (1:0) майдондан четлатилди ва тўртта учрашувга дисквалификация қилинди.