Амстердамнинг «Аякс» клуби тажрибали ҳимоячи Дейли Блинднинг жамоага қайтганини расман эълон қилди.
Қайд этилишича, 36 ёшли футболчи «Жирона»дан кетгач, эркин агент сифатида ўзининг севимли клубига қайтди ва 2027 йил 30 июнга қадар амал қиладиган шартнома имзолади.
Бу Блинднинг «Аякс»га тўртинчи бор қайтиши ҳисобланади. У тўққиз ёшида клуб академиясига келиб қўшилган ва 2008 йилда асосий жамоада дебют қилган. Кейин 2010 йилда «Гронинген»даги ижарадан қайтган, 2018 йилда эса «Манчестер Юнайтед»дан яна Амстердам клубига келган. Энди эса ҳимоячи яна бир бор «Аякс» либосини кияди.
Футболчи фаолияти давомида «Аякс» билан етти марта Нидерландия чемпиони, икки карра мамлакат Кубоги ва икки марта Суперкубок соҳиби бўлган. У Амстердам клуби асосий жамоаси сафида 333 та учрашув ўтказиб, 13 та гол урган.
Футболчи шунингдек, «Манчестер Юнайтед», «Бавария» ва «Жирона» клубларида ҳам тўп тепган.
