«Барселона» клуби қишки трансфер ойнасида «Бавария» ҳимоячиси Жонатан Та билан шартнома имзолаш имкониятини кўриб чиқмоқда.
Sky Germany журналисти Флориан Плеттенбергнинг маълум қилишича, каталонияликлар 29 ёшли футболчи бўйича дастлабки сўров юборган.
«Барселона» спорт директори Деку ёш Пау Кубарсига шерик бўла оладиган тажрибали марказий ҳимоячини қидирмоқда. Жонатан Та номзоди ушбу талабларга мос келади.
Бундан ташқари, футболчининг агенти Пини Заҳави каталонияликлар президенти Жоан Лапорта билан яхши муносабатларга эга.
Бироқ германиялик ҳимоячининг ўзи «Бавария»ни тарк этишни режалаштирмаяпти. У фаолиятини жамоада узоқ вақт давом эттириш ҳақида ўйламоқда.
Маълумот учун, футболчининг амалдаги шартномаси 2029 йилнинг ёзига қадар мўлжалланган.
