«Барселона» спорт директори Деку «Интер» ҳужумчиси Лаутаро Мартинеснинг вакили билан учрашув ўтказди.
Журналист Жерар Ромеро хабарига кўра, учрашув ўтган ҳафта бўлиб ўтган. Томонлар 28 ёшли аргентиналик футболчининг «Барселона»га эҳтимолий трансфери истиқболларини муҳокама қилган.
Лаутаро Мартинес «Атлетико» ҳужумчиси Хулиан Алварес трансферини амалга оширишнинг иложи бўлмаган тақдирда «Барселона»нинг муқобил вариантларидан бири сифатида кўрилмоқда.
Каталонияликлар ҳозирда Алваресни асосий мақсад сифатида кўрмоқда, бироқ «Атлетико» аргентиналик футболчини сотиш ниятида эмас. Шу сабабли «Барселона» ҳужумчи позицияси учун бошқа номзодларни ҳам ўрганмоқда.
Маълумот учун, Лаутаро Мартинес ўтган мавсум барча мусобақаларда 41 та учрашувда майдонга тушиб, 22 та гол ва 6 та голли узатмага муаллифлик қилган. Унинг «Интер» билан амалдаги шартномаси 2029 йилнинг ёзигача амал қилади. Тransfermarkt аргентиналик ҳужумчининг бозор қийматини 85 миллион евро деб баҳоламоқда.
