Анвар Ғофуров: «Бу жамоани ҳурмат қиламан, лекин уларга ютқазмаслигимиз керак эди»

«Сурхон» клуби Ўзбекистон Кубоги нимчорак финалида биринчи лига қатнашчиси - «Гулистон»га қарши майдонга тушди ва кутилмаганда 1:0 ҳисобида ютқазиб, мусобақани тарк этди. Учрашувдан сўнг «Сурхон» устози Анвар Ғофуров матбуот анжуманида шундай деди:

- Мен билгандим ва футболчиларга осон ўйин бўлмаслигини уқтиргандим. Бу яхши ва курашчан футболчиларга эга жамоа. Ҳар бир метр учун курашадиган клуб. Ушбу жамоани «Бухоро» ва «Нефтчи» билан ўйинларда кузатдим. Шунга амин бўлдимки, охирги дақиқагача курашадиган жамоа.

Яхши шаклланган, ўзига яраша ўйин услуби бор. Улар тўпсиз ўйнашга ҳам тайёр. Бу жамоани ҳурмат қиламан, лекин биз уларга ютқазмаслигимиз керак эди. Қайсидир футболчи ўйиндан олдин ютган бўлиши мумкин. Балки мен нотўғри етказгандирман. Лекин етказишга ҳаракат қилгандим. Шунча ўйнаган бўлсак, энг кўп мана шу клубга урғу бергандим. Биринчи лига билан ўйнаяпмиз ва бу алдамчи ҳолат бўлиши мумкинлигини футболчиларга айтгандим. Яхши футболчиларга эга жамоа эди ва буни ўйинда ҳам кўрдик, борларини бериб ҳаракат қилишди ва охирида ўз ниятларига еришдилар. Бизда ҳам имкониятлар бор эди, унумли фойдаланишимиз лозим эди.

Бу учинчи ўйинки, гол ура олмаяпмиз. Бу ачинарли. Бироқ мен ишонаманки, бундан ҳам кучлироқ бўламиз. Бизга дарс бўлди, деб ўйлайман. Ҳаммамиз керакли хулосаларни қиламиз. Бунақаси бошқа қайтарилмайди. Бунга ишонаман. Бу жамоавий ўйин ва ҳаммамиз биргаликда ҳал қилишимиз керак. Бир-иккита одам буни ҳал қилмайди. Хулосалар қилиб, бундан-да, яхшироқ ўйнашимиз керак. Вазиятлардан унумли фойдаланишимиз лозим», - дея Ғофуровнинг сўзларини келтиради Tribuna.uz мухбири.