«Наполи» яримҳимоячиси Андре-Франк Замбо Ангисса ёзги трансфер ойнасида жамоани тарк этишга тайёр. Бу ҳақда calcionapoli1926.it нашри хабар берди.
Манбага кўра, неаполликлар бош мураббийлигига Массимилиано Аллегри келиши кутилаётган бўлса-да, бу ҳолат камерунлик футболчининг қарорини ўзгартирмаган.
Қайд этилишича, Ангиссага Европанинг нуфузли чемпионатларидан бир қатор таклифлар келиб тушган ва у фаолиятида янги босқични бошлашни истамоқда.
«Наполи» раҳбарияти эса футболчининг эҳтимолий кетишига тайёргарлик кўрмоқда. Унинг ўрнига асосий номзод сифатида Адриен Рабё тилга олинмоқда.
Франциялик яримҳимоячи аввалроқ айнан Аллегри қўл остида «Ювентус»да муваффақиятли фаолият олиб борган. Шу сабабли мураббийнинг янги жамоасига эргашиши эҳтимоли юқори баҳоланмоқда.
Бундан ташқари, «Фламенго» футболчиси Эвертон Араухо ҳам номзодлар қаторидан жой олган. Бразилиялик яримҳимоячининг ўйин услуби Ангиссаникига ўхшаш экани таъкидланмоқда.
