Пролигада дебютини ўтказаётган Самарқанднинг «Каттақўрғон» жамоасида яқинда бош мураббий ўзгарди. Россиялик Юрий Уткульбаев ушбу лавозимни эгаллагач, ўзига ёрдамчи мураббий сифатида Вагиз Галиулинни олиб келди.
Ҳа, бу ном ўзбек мухлислари учун жуда яхши таниш. Ўз вақтида Ўзбекистон миллий жамоаси таркибида тўп тепган. Шунингдек, Россиянинг бир қанча клубларида ҳам самарали фаолият олиб борганини зукко мухлислар яхши биладилар.
Энди Галиулин мураббийликка қадам босди. Вагиз юртимизга қайтиб, «Каттақўрғон»да иш бошлагач, Tribuna.uz журналисти у билан учрашди.
- Яқинда «Каттақўрғон» мураббийлар штабида иш бошлаганингизни эшитдик. Бу қандай содир бўлди ва ўзингизни мураббий ролида қандай кўряпсиз?
- Мураббийликка киришишимни асосий сабаби, Юрий Анварович Уткульбаев бўлди. У билан Казанда гаплашиб турардик. Илгари кўп бор бирга ишлаганмиз. Футболчига фаолиятини тугатганидан кейин бирор жойда иш топиши осон бўлмайди. Юрий Анварович менга иш чиқди, сен ўзбекистонликсан ва кўп ўйинчиларни биласан, мен билан ишла ва мураббийликни ўрганасан, деб айтди. Мен унинг таклифини қабул қилдим ҳамда ушбу клубга келдим. У ерда мен ўрганяпман ҳам ва йигитларга ёрдам ҳам беряпман. Майдонда ўзим ҳам бирга машғулот қиляпман. Ҳозирча ёқяпти, ўргангим келяпти. Параллел равишда мураббийлик курсларида ўқимоқчиман. Кейин ҳаёт кўрсатади, нима бўлишини.
- Футболчиликни охирги қисмини 2024 йилда «Андижон»да ўтказгандингиз. Демак, шундан сўнг бутсаларингизни михга илгансиз-а?
- Ҳа, «Андижон»дан кейин бутсаларимни михга илдим. Лекин, биласизми, айнан «Андижон»га келганимдан жуда хурсанд бўлганман. Ҳар доим у ерга қайтиш иштиёқим бўлган. Мухлислар ҳам кутишарди. Андижонда ўзим учун жуда кўп эмоция олдим, Кубокни ютдик. Коллектив, мураббийлар штаби, ҳамма-ҳаммага раҳмат айтаман.
- 2024 йилни «Андижон»да якунлаганингиздан кейин орадаги шунча вақт давомида нима иш билан машғул бўлдингиз?
- Соғлигим билан шуғулландим. Бу биринчи ўринда ва энг асосийси. Бу ишга тахминан ярим йилча вақт кетди. Кейин оилам, фарзандларим билан машғул бўлдим. Каттаси футболчи, кичкинаси хоккейчи. Барча эътиборим ва вақтимни уларга сарфладим. Жуда маза қилдим.
- Энди сиз яна футболдасиз ва олдингидек фаол иш жараёнига қайтдингиз. Вагиз Галиулинни футболчи сифатида билардик. Энди Вагиз Галиулин мураббий сифатида қандай?
- Ҳозирча бу борада нимадир айта олмайман. Чунки бу соҳани энди бошлаяпман, ўрганяпман. Айни пайтда Вагиз Галиулин қанақа мураббийлигини айта олмайман. Бу соҳани ўрганяпман. Дадам билан ҳам доимий равишда гаплашиб, ёзишиб тураман. Мураббийлик бўйича дадамдан ҳам кўп маслаҳат ва тавсиялар оляпман. Ҳозирча мураббийликда ўзимни қандайдир чизмам йўқ. Бу ишда ўқиб, янада чуқурроқ кириб ўрганганимдан сўнг нимадир айтсам бўлади.
- «Каттақўрғон»дан таклиф бўлишини, мураббийликка ўтишингизни кутганмидингиз?
- Тўғриси, катта сюрприз бўлди. Кутмагандим. Шунақа вариант чиқиб қолди, мен Юрий Уткульбаев билан олдин айтганимдек футболчи сифатида кўп ишлаганман. Мени яхши биларди. Шу таклифни берганида озгина ўйландим, кейин рози бўлдим. Ёрдам ҳам бераман, ўзим ҳам ўрганаман, менга ҳам тажриба бўлади. Мураббий бўламанми ёки бўлмайманми, барибир бу ҳаётда тажрибага айланади. Бош мураббийга ёрдам беришга тайёрман. Ҳозир «Каттақўрғон»дамиз.
- Бу йил ушбу клуб про лигада дебютини ўтказяпти. Катта лойиҳага айлантирилган. Таркибида тажрибали ўйинчилар йиғилган. «Каттақўрғон»га келиб, инфратузилмаси билан танишгач, сизда қандай таассурот уйғотди?
- Биринчи таассуротлар яхши. Муҳими, футболчилар мураббийлар штабининг тактикасини, услубини ўрганиб боряпти. Юзага келган танаффус бизга фойда бўлди. Шу вақт ичида кўпроқ тактика, жисмоний ҳолатлар устида ишлаймиз. Йигитлар яхши таассурот қолдиришяпти.
- Иккинчи даврада жамоани имконияти қандай? Чунки Суперлигага чиқиш учун «Арал», «Шўртан», «Металлург» каби жамоалар билан рақобатлашяпти.
- Интрига ажойиб, жамоалар яхши. Ҳозирча имконият бор ва биз охиригача курашамиз.
- Жаҳон чемпионатига мухлислик қилаётган жамоаларингиз ва Ўзбекистон миллий жамоамизни имконияти ҳақида гап кетганда нималарни айта оласиз?
- Биринчи ўринда Ўзбекистонимизга мухлислик қиламиз. Фаворитлар, менимча, Франция ҳамда Португалия. Миллий жамоамизни имкониятига келсак, менимча, гуруҳдан чиқишимиз мумкин. Рақиблар билан ўйнаса бўлади. Нимагаки, Ўзбекистон миллий жамоамизни савияси кўтарилган. Бор кучи билан ўйнашса кейинги босқичга чиқса бўлади. Биринчи вазифа менимча шу. Миллий жамоамизга омад тилайман!
