Андрей Микляев: «Ўйин шахсан менга ёқди»

Ўзбекистон Кубоги 1/8 финал доирасидаги «Андижон» – «Олимпик Мобиуз» учрашувидан кейин меҳмонлар спорт директори Андрей Микляев матбуот анжуманида иштирок этди.

— Нима дейиш мумкин? Менимча, бугунги ўйин барчага, жумладан, мухлисларга ҳам ёқди.

- Албатта, ўзингиз тушунасиз, кубок баҳслари доимо юқори шиддат ва кескинлик остида ўтади. Биз учун «Андижон» ўзига хос принципиал рақиб эди. Биз ҳам футбол ўйнай олишимизни кўрсатишни хоҳладик. Менимча, бугун буни уддаладик.

Умуман олганда, ўйин шахсан менга ёқди. Ҳатто 0:2 ҳисобида ортда бораётганимизда ҳам ўйинга қайтишнинг уддасидан чиқдик. Энг муҳими, чуқур ҳимояга ёпилиб олмадик. Биз бугун ғалаба қозонишимиз ҳам, мағлуб бўлишимиз ҳам мумкин эди — мен айнан ўйиннинг ўзи ҳақида гапиряпман. Пеналтилар серияси эса... ўзингиз биласиз, пеналти — лотерея.

Бутун жаҳон чемпионатини ҳам кўрдик, у ерда ҳам шундай ҳолатлар бўлган. Албатта, бироз аламли. Ҳозир йигитлар хафа, айримлари йиғлаяпти. Аммо футбол шу — пеналтилар серияси. «Андижон» жамоасини кейинги босқичга чиққанлиги билан табриклайман ва уларга келгуси ўйинларда омад тилайман.

— Жамоани 120 дақиқа давомида қутқариб келган дарвозабонни пеналтилар серияси олдидан алмаштиришга нима сабаб бўлди? Ахир руҳий томондан ҳам биринчи дарвозабон пеналтилар сериясига тайёр эди. Иккинчи дарвозабон эса қийналиб қолди ва бирорта пеналтни қайтаришнинг уддасидан чиқа олмади. Нега бундай қарор қабул қилинди? Биринчи дарвозабон қолгани яхшироқ эмасмиди?

— Нега дарвозабонни алмаштирдик? Машғулотларда биз пеналтилар сериясига ҳам тайёргарлик кўрамиз. Баъзида машғулот пайтида пеналтилар тепамиз. Иккинчи дарвозабоннинг ҳам пеналтилар пайтида ўзини яхши кўрсатиш имконияти бор, деб ҳисобладик.

Бизда дарвозабонлар мураббийи бор ва айнан у ҳам шу масалада ўз фикрини билдирди. Умуман олганда, қарор шу тарзда қабул қилинди: у дарвозада пеналтиларни яхши тахмин қила олади, деб ўйладик. Аммо кўриб турганингиздек, бу сафар тахминларимиз ўзини оқламади. У бирорта пеналтни қайтара олмади. Бундай ҳолатлар футболда бўлиб туради.

— Японияда бўлиб ўтаётган Осиё чемпионатига жамоангиздан бир нечта футболчи чақирилган. Уларнинг бугун майдонда йўқлиги қанчалик сезилди?

— Биласиз, ҳозир Японияда Осиё ўйинлари бўлиб ўтмоқда. Жамоамиздан бир нечта футболчи терма жамоага чақирилган. Тўрт нафар футболчимиз ҳозир терма жамоа таркибида. Бош мураббийимиз ҳам у ерда.

Шу сабабли бугунги матбуот анжуманида жамоа номидан мен иштирок этяпман. Бундан ташқари, ёрдамчи мураббийимизда қизил карточка бор.

Шу фурсатдан фойдаланиб, Осиё ўйинларида иштирок этаётган миллий терма жамоамизга ҳам омад тилаймиз. Бугун, агар билсангиз, улар Филиппин терма жамоасини 5:1 ҳисобида мағлуб этишди. Келгуси ўйинларда ҳам уларга омад тилаймиз. Биз эса бу ерда ўз вазифаларимизни бажаришда давом этамиз.

— Лекин «Олимпик Мобиуз» Про лигада ўртамёналар қаторида. Жамоага нима етишмаяпти? Ахир бугунги ўйиндагидек футбол кўрсатиш мумкин экан-ку?

— Яхши савол. Про лигада биз, умуман олганда, жамоа шакллантириш билан шуғулланяпмиз. Ўтган мавсумдан кейин жамоамизни саккиз нафар футболчи тарк этди. Қолаверса, уларнинг барчаси Суперлига жамоаларига ўтиб кетишди. Масалан, Фарғона клуби икки нафар футболчимизni олди. «Қизилқум»га ҳам, «Насаф»га ҳам футболчиларимиз ўтишди.

Албатта, футболчилар юқори босқичга кўтарилаётган бўлса, биз уларни рағбатлантиришимиз ва қўйиб юборишимиз керак. Уларнинг ўрнига эса бошқа футболчилар келди. Албатта, янги футболчиларни жамоага мослаштириш ва яхлит жамоани шакллантириш учун маълум вақт керак.

Шу тариқа аста-секин жамоани шакллантиряпмиз. Биз ёш футболчиларни тарбиялаш учун ишлаяпмиз. Улар келажакда Суперлигада ўйнай оладиган даражага етишишини хоҳлаймиз. Чунки ўзингиз тушунасиз, барча футболчилар Суперлигада ўйнашни истайди.

Биз ҳам айнан шу мақсадда ишлаяпмиз. Агар бизнинг футболчиларимизни Суперлига клублари олаётган бўлса, демак, биз уларни яхши тарбиялаганмиз. Демак, уларга талаб бор. Шунинг учун футболчиларимизнинг жамоадан кетиши биз учун бир томондан йўқотиш бўлса-да, бошқа томондан бу уларнинг ўсиши учун яхши имконият.

Ҳатто сўнгги трансфер ойнасида ҳам бир нафар ҳужумчимиз жамоани тарк этди. Ҳозир у Самарқандда ўйнаяпти. Ғафур Ҳайдаров. Албатта, унинг кетиши биз учун йўқотиш. Лекин у Суперлигага ўтди. Бу унинг ўзи учун ҳам яхши. Демак, уни Суперлига клуби танлади. Бу эса биз уни тўғри тарбиялаганимизни англатади.
Энди у ерда ўйнасин, янада ривожлансин. Биз эса ўз ишимизни давом эттирамиз. Ёш футболчиларни тарбиялаймиз ва бошқа йигитларни ҳам юқори даражага олиб чиқишга ҳаракат қиламиз.

— Таркибда андижонлик бир қатор футболчилар ҳам бор эди. Уларнинг ўйинини қандай баҳолайсиз?

— Ҳа, уларни асосий таркиб футболчилари, деб айтиш мумкин. Улар асосий таркибда майдонга тушиб, ўйинларда иштирок этишяпти.
Умуман, биз Шукурдан ҳам, Панжидан ҳам мамнунмиз. Биласизми, биздаги футболчиларнинг деярли барчаси бир ёшдаги йигитлар. 2005 ва 2006-йилларда туғилганлар. Ёш жиҳатидан ҳаммаси деярли тенг.
Шукур ва Панжи эса ҳозир жамоада етакчилик қилаётган футболчилардан ҳисобланади.