«Ан Наср» ҳужумчиси Криштиану Роналду Саудия Арабистони клуби эгаларидан бирига айланиши мумкин, деб хабар бермоқда DAZN Portugal.
Манбага кўра, 41 ёшли португалиялик ва яна тўрт нафар инвестор «Ан Наср»ни сотиб олиш бўйича таклиф тайёрламоқда. Томонларнинг ҳар бири битимга камида 92 миллион евро сармоя киритмоқчи.
Роналду 2022 йилнинг декабр ойидан буён «Ан Наср» сафида тўп тепмоқда. Унгача ҳужумчи «Спортинг», «Манчестер Юнайтед», «Реал» ва «Ювентус» клублари шарафини ҳимоя қилган.
Португалиялик футболчи беш карра «Олтин тўп» соҳиби бўлган ва Чемпионлар лигасида ғолиб чиққан, Португалия миллий жамоаси билан эса Европа чемпионати ва икки марта Миллатлар лигасида зафар қучган.
