Ўзбекистон Кубоги 1\8 финал босқичи доирасида «Бунёдкор» «Локомотив» майдонида 1:0 ҳисобида мағлубиятга учради. Ўйиндан кейинги матбуот анжуманида «Бунёдкор» устози Иван Бошкович ўз фикрлари билан ўртоқлашди.
— Ўйинда атиги битта гол урилгани, албатта, афсусли. Чунки жамоамизда ҳам, «Локомотив»да ҳам гол уриш учун кўплаб вазиятлар бўлди. Мен учун энг муҳими — жамоамизнинг бугунги энергияси яхши бўлгани. Ўйинчилар деярли барча кўрсатмаларимни, айниқса иккинчи бўлимда айтган ва талаб қилган вазифаларимни бажаришди. Майдонда рақобатлашишга тайёр, ҳатто агрессив футбол ўйнашга ҳаракат қилган жамоани кўрдим. Юқори прессинг қўллашга уриндик, айрим вазиятларда рақибнинг ҳаракатларини яхши тўхтатдик.
Биринчи бўлимнинг дастлабки 25 дақиқасида барқарор ўйнадик ва ўйинни назорат қилдик. Аммо биринчи бўлимнинг иккинчи қисмида, менимча, «Локомотив» бироз яхшироқ кўриниш берди. Шу сабабли ўзимиз яратган имкониятлардан фойдалана олмадик.
Иккинчи бўлимда эса айрим жиҳатларни тўғриладик. Танаффусда керакли кўрсатмаларни бердим ва футболчилар ҳам уларни бажаришди, деб ўйлайман. Захирадан майдонга тушган бир нечта футболчи ҳам жамоага ёрдам берди. Футболчиларга нисбатан ҳеч қандай эътирозим йўқ. Менимча, жамоа бугун «Насаф» ва «Сурхон»га қарши ўйинларга қараганда, кутилганидан ҳам яхшироқ ҳаракат қилди.
Энди ишлашда давом этишимиз керак. Олдинда жуда муҳим ўйинлар турибди. Бугунги учрашувдан кейин жамоамиз ўйинини янада яхшилаши ва Суперлигада қолишимиз учун яхши натижаларга эришиши мумкинлигига ишончим янада ортди.
— Бугун жамоада тажрибали футболчилардан Рахмонов қолган. Қолган тажрибали футболчиларнинг аксарияти ёшлар. Агар сизда маълумот бўлса, ушбу футболчиларни кейинги тақдирини айтиб ўтсангиз. Улар кейинги турда ҳам майдонга тушадими?
— Мураббий сифатида ҳозир уларни, аввало, психологик жиҳатдан қўллаб-қувватлаш мен учун жуда муҳим. Жамоа асосан ёш футболчилардан ташкил топган. Лекин мен уларнинг шу ўйинлар орқали тез ривожланишлари мумкинлигини яхши биламан. Суперлигада ўйнаганда интенсивлик юқори бўлади, босим ҳам катта. Ёш футболчилар эса бундай шароитга жуда тез мослашиб кетишади.
Ҳозирги танаффус ҳам бизга ёрдам беради, деб ўйлайман. Кейинги тургача тахминан 20 кун вақт бор. Бу даврда кўп жиҳатларни яхшилаб олишимиз мумкин. Мен жамоа кучли ва интенсив футбол ўйнашини талаб қиляпман. Менимча, бу услуб ёш футболчиларга ҳам мос келади. Катта ёшдаги, тажрибали футболчилар эса жамоага ўз тажрибаси билан ёрдам беришади.
Бугун футболчиларнинг муносабати ва мотивациясида муаммо кўрмадим. Албатта, барчамиз жамоанинг ҳозирги вазиятини яхши биламиз. Лекин мен барча эътиборимни футболга қаратдим ва маълум бир прогресс бор, деб ҳисоблайман. Илгари ҳам жамоа яхши футбол кўрсатаётган эди.
Футболчиларнинг психологиясида бироз ўзгариш бўлган. Бундай вазиятдан осонликча чиқиб кетиш қийин. Мен уларга доим бир нарсани айтаман: ҳеч қачон таслим бўлмаслик керак. Биз ишлаётган нарсамизга ишонишимиз лозим. Бизда бошқа йўл йўқ. Кейинги ўйинга эътибор қаратишимиз ва бошимизни эгмаслигимиз керак. «Бунёдкор» тарихида бундай вазиятлар бўлган, аммо клуб ҳар доим қийин вазиятдан чиқиб кетган. Шунинг учун буни ҳамма яхши тушунади, деб ўйлайман. Биз ўйин сифатини оширишда давом этамиз ва футболчилар янада яхши футбол кўрсатишади.
— Сиз ўзингиз ҳам яхши ҳужумчи бўлгансиз, Ўзбекистонда ўйнагансиз. Бу масала нафақат мураббий сифатида, балки собиқ ҳужумчи сифатида ҳам сизга тегишли. Ҳозир ёш футболчилар ривожланишини айтяпсиз. Аммо бизда якунловчи зарбалар, яъни вазиятларни голга айлантириш билан боғлиқ катта муаммо бор. Ҳужумчилар билан бу йўналишда ишлаяпсизми?
— Ҳозир менда бу борада тўлиқ ишлаш учун жуда кам вақт бўлди. Ҳали барча футболчиларни етарлича яхши билмайман. Албатта, агар менда кўпроқ вақт бўлганида яхшироқ бўларди. Лекин, албатта, ҳужумнинг сўнгги учдан бир қисмида ишлаймиз. Факт шуки, биз гол ура олмаяпмиз. Шунинг учун бу камчиликлар, кўплаб муаммолар устида ишлашимиз керак. Ҳозир менинг вазифам битта — шу йил «Бунёдкор»ни Суперлигада сақлаб қолиш.
Менимча, «Бунёдкор» бунга муносиб. Қанча кўп яхши футболчилар ушбу клубдан миллий жамоаларга етишиб чиққанини, Суперлигада ўйнаганини ва ҳозир Европа даражасида футбол ўйнаётганини ҳаммамиз биламиз. Мен учун «Бунёдкор»нинг Суперлигада ўйнамай қолиши ёки ҳозирги каби вазиятда бўлиши бутун ўзбек футболи учун ҳам салбий ҳолат бўлади. Шунинг учун мамлакатимиздаги, умуман футболни яхши кўрадиган барча инсонлар бу вазиятни тушунишларига ишонаман.
Умид қиламанки, мен ҳам четда қолмайман. Бу клуб олдида ўз бурчим борлигини ҳис қиламан. Шунинг учун бу уч йил... Айнан шу сабабли бу ерга келдим — ўзимда бор барча нарсани клуб учун бериш, жамоага ёрдам бериш учун.
— Лутфулла Тўраев қандай вазифани бажаряпти?
— Айни пайтда менга ёрдам беряпти. Улуғбек Бакиев ҳам жамоа штабида ишлаяпти. У академияда олти йилдан буён фаолият юритади, шунингдек, уч йил давомида мусобақаларда ҳам ишлаган.
Ҳозирги штабда дарвозабонлар мураббийи Мурат Алимов ҳам бор. У ҳам академиядан чиққан ва клуб тизимида анчадан бери фаолият юритиб келмоқда. Шунинг учун штабдаги мутахассисларнинг барчаси клуб тизимидан чиққан, биз уларни яхши биламиз ва улар билан узоқ вақтдан бери ишлаб келяпмиз», - дея Бошковичнинг сўзларини келтиради Tribina.uz мухбири.
