21-турнинг сўнгги турида марказий учрашув «Бухоро» - «Навбаҳор» ўртасида бўлиб ўтди. Унда мезбонлар рақибига 1:4 ҳисобида мағлубиятга учради. Учрашувдан кейин бухороликлар устози Александр Хомяков матбуот анжуманида иштирок этди.
- Ўйин ҳақида қандай фикр билдиришим мумкин? Биз деярли барча компонентларда мағлуб бўлдик. Шунинг учун рақибни муносиб ғалаба билан табриклашдан бошқа гап йўқ. Шу боис ўйин, айниқса, бизнинг ҳаракатларимиз ҳақида гапириш қийин. Кўп нарса ўхшамади. Афтидан, бизда пасайиш бошланди. Афсуски, бир ўйиндан иккинчисига футболимиз сифати тобора ёмонлашиб боряпти. Натижа ҳам шунга яраша.
Албатта, ҳозир кўп нарсани гапириш мумкин. Лекин яна бир бор айтаман: буларнинг барчаси ўзини оқлашдек кўриниши мумкин. Рақиб эса бугун барча жабҳаларда биздан кучли бўлди ва ғалабага муносиб эди. Биз ҳар томонлама рақибга ютқаздик. Шунинг учун яна бир бор рақибни ғалаба билан табриклайман.
- Жамоавий ўйин ҳақида... Масалан, «Пахтакор»га ёки бошқа жамоаларга қарши ўйинларда футболчиларингизда қандайдир учқун, жўшқинлик кўринади. Бугун эса бундай ҳолатни кўрмадик. Бу нима билан боғлиқ?
- Бу нима билан боғлиқлигини билмайман. Афсуски, бундай муҳим ўйинларда қандай ўйнаш кераклигини жуда яхши тушунган эдик. Ушбу баҳснинг аҳамиятини ҳам яхши билардик. Аммо бугун биз шундай ўйнай олмадик. Ҳатто рақибга курашни ҳам мажбурлай олмадик. Ўйин олдидан кўрсатмаларда гапирган нарсаларимизнинг деярли барчасини амалга ошира олмадик. Учта голнинг барчасини, катта ҳисобда, ўтиш фазаларида ўтказиб юбордик. Биринчи голни ҳисобга олмаяпман, у ерда учинчи дақиқада ўзимиз тушунарсиз тарзда гол ўтказиб юбордик. Ҳатто ўйиннинг бошидаёқ рақибга устунлик бериб қўйдик. Бу саволга жавоб бериш мен учун қийин. Ростдан ҳам, бугун учқун бўлмади. Балки футболчиларимиз бироз чарчаб, ўйинлар кўпайиб кетгандир. Куч етишмади, маҳорат етишмади. Бундай ўйинларда фақат ҳис-туйғунинг ўзи етарли эмас, яна нимадир керак. Бугун эса бизда ҳеч нарса ўхшамади. Биз ёмон ҳимояландик, ёмон ҳужум қилдик. Иккинчи тўплар учун курашларнинг барчасида ютқаздик. Ўйинимиз умуман қовушмади. Бу нимадан эканини билмайман, бу ҳақда ўйлаймиз. Гарчи мен бунинг сабабини, аслида, тушуниб турибман.
Қаранг, балки биз турли футболчилар билан ўйнаётгандирмиз. Лекин ҳозир буни айтиш ҳам кўпроқ ўзини оқлашдек кўринади. Шундай дейман: биз майдон марказини рақибга бой бердик. Марказий зонада одатда ўйнайдиган футболчиларимиз бугун йўқ эди. Ваҳоланки, биз айнан марказий зона ҳисобига ўйнаймиз.
Албатта, ҳаракат ҳам муҳим. Бугун сиз айтганингиздек, жамоага «учқун» бера оладиган футболчиларимиз ҳам йўқ эди. Улар шунчаки бугун биз билан эмас эди. Бизда бор-йўғи икки нафар ярим ҳимоячи қолганди. Уларнинг иккаласи ҳам кўпроқ ҳужумкор режадаги футболчилар. Шунинг учун ҳимояда жуда яхши кўринмадик. Яна бир бор айтаман: биз ўтиш фазаларида мағлуб бўлдик. Ўтказиб юборган учта голимизнинг барчаси мажбурий бўлмаган голлар эди. Тўпни йўқотганимиздан кейин рақиб бундай вазиятлардан фойдаланди. Шуни айтиш мумкинки, жамоада пасайиш бор. Афсуски, бу пасайишсиз мавсумни ўтказа олмадик.
Биз биринчи ҳам эмасмиз, охирги ҳам эмасмиз. Ҳозир кўплаб жамоалар беқарор ўйнаяпти. Шунинг учун вақт бор. Ўйлаймиз, қарорлар қабул қиламиз ва бу вазиятдан чиқишга ҳаракат қиламиз.
- Бугунги ўйиндан кейин «Бухоро» бронза медаллари учун курашдан чиқиб кетдими?
- Агар назарий жиҳатдан оладиган бўлсак, эҳтимол, ҳа. Чунки саккиз очко — бугунги чемпионатдаги зичликни ҳисобга олсак, катта фарқ. Бу камомадни қоплаш қийин бўлади. Лекин яна бир бор такрорлайман: ҳозир барча жамоалар очко йўқотяпти. Ҳеч ким ҳозирча мутлақо барқарор ўйнамаяпти. Шунинг учун ҳаракат қилиб кўрамиз, мавсумни давом эттирамиз. Чиқиш йўлини излаймиз, футболчилар учун мотивация қидирамиз. Олдинда ҳали ўнта тур бор, ҳозир тўхтаб қолишга эрта. Ҳаракат қиламиз, бор кучимизни ишга соламиз.
Албатта, Рўзиевни йўқотганимиздан кейин анча кучсизландик. Натижаларнинг ўзи ҳам буни кўрсатиб турибди. Ҳайдаров терма жамоага кетди, Хайруллаев ҳам йўқ эди. Шунинг учун таянч зонада катта муаммолар юзага келди. Жўраев эса карточка олгани сабаб дисквалификация қилинди. Бизда рақибнинг ҳужумларини бузиб, тўпни олиб қўядиган типдаги ярим ҳимоячи йўқ эди. Барибир икки нафар ярим ҳимоячимиз ҳам, Қувондиқ Рўзиев ҳам кўпроқ ҳужумкор режадаги футболчилар. Шунинг учун уларнинг ҳимоявий кўникмалари ҳозирча етарлича юқори эмас. Менимча, бугунги ўйинда мағлуб бўлганимиз сабабларидан бири ҳам шу.
- Бир неча ўйиндан бери Бегич ҳақида гапиряпмиз, унга ўйинни давом эттириш учун етарлича имконият берилмаяпти. Кўпинча энг яхши кўринаётган футболчилардан бири — Доминик Бегич. Нега унга кам вақт бериляпти? Ахир Ники Качарава ўз имкониятларидан фойдалана олмаяпти-ку?
- Биринчидан, рақибда бўйи баланд тўрт нафар ҳимоячи борлигини ҳисобга олдик. Сиз ҳам кўрдингиз. Шунинг учун бизга юқори тўпларда кураша оладиган футболчи керак эди. Никининг бўйини ҳисобга олган ҳолда, унинг роли бугун Доминик Бегичнинг ролидан муҳимроқ бўлади, деб ҳисобладик. Шунинг учун у асосий таркибда майдонга тушди.
- Ҳамроев жароҳат олганидан кейин бу ҳолат ўйинга қанчалик таъсир қилди?
- Бу ўйинга қанчалик таъсир қилганини билмайман. Менимча, унинг жароҳати эмас, балки гол ўтказиб юборган эпизодимиз кучлироқ таъсир қилди. Учинчи дақиқада мажбурий бўлмаган гол ўтказиб юбордик. Яна рақибга бурчак зарбасини тез ижро этиш имконини бердик ва натижада тушунарсиз вазият юзага келди. Шундай қилиб, жуда ноқулай гол ўтказиб юбордик. Бундай муҳим ўйинда учинчи дақиқадаёқ рақибга устунлик бериб қўйиш ёқимли эмас. Шу сабабли эҳтимол, бу ҳам таъсир қилгандир.
Гарчи биз ҳисобни 1:1 қилиб, ўйинга қайта олган бўлсак-да, кейин... Ҳа, биз жуда яхши ҳимояланмадик, лекин биринчи бўлимдаги шу голдан кейин рақибда аниқ имкониятлар бўлганини эслай олмаяпман. Улар устунлик қилди, ташаббусни ўз қўлида ушлади, лекин менинг назаримда, яққол голли вазиятлар унчалик кўп бўлмади. Яна бир бор айтаман, биз бироз очилиб кетдик ва рақиб бизни шунинг учун жазолади. Бундай ўйинлар бироз бошқача ўйналади. Бу — тажриба. Тажриба эса инсонга ҳамма нарсани ўргатади. Яна бир бор айтаман, бу вазиятдан чиқишга ҳаракат қиламиз», - дея Хомяковнинг сўзларини келтиради Tribuna.uz мухбири.
