«Нюкасл» клуби ва Англия миллий жамоасининг собиқ ҳужумчиси Алан Ширер ЖЧ-2026 финалида ўзаро тўқнаш келадиган Испания ва Аргентина миллий жамоалари ҳақидаги фикрларини билдириб, фаворитни танлади.
«Очиғини айтсам, бу баҳс натижасини олдиндан айтиш жуда қийин. Испанияни оладиган бўлсак, улар Францияга қарши яримфиналда ажойиб футбол намойиш этди.
Шуни ҳам унутманг, айнан шу Испания турнирдаги илк ўйинида Кабо-Верде устидан ғалаба қозона олмаганди. Бироқ 2010 йилда ҳам улар Швейцарияга ютқазган, кейин эса жаҳон чемпионига айланганди. Ўшанда ҳам мен Испания ҳақида хавотирланишга асос йўқлигини айтгандим. Бу жуда кучли жамоа. Уларнинг тўпни назорат қилиши ва ўйинни бошқариши ҳайратланарли.
Аммо кейин Аргентинага қарайсиз ва улар қанчадан-қанча оғир вазиятлардан чиқиб кетганини кўрасиз. Масалан, Мисрга қарши 0:2 ҳисобида ортда бораётганди, Англияга ҳам 0:1 ютқазаётганди, аммо барибир камбек қилди. Бу жамоанинг жасорати ва характерига қойил қолмасликнинг иложи йўқ. Қолаверса, таркибингизда Месси бўлса, сизда доимо имконият бўлади. Шу сабабли мен фаворит сифатида Аргентинани танлайман», — деди Ширер Тribal Football нашрига берган интервюсида.
Эслатиб ўтамиз, ЖЧ-2026 финал баҳси 19 июл куни АҚШнинг Ню-Жерси штатидаги «Метлайф» стадионида бўлиб ўтади. Учрашувни словениялик ҳакам Славко Винчич бошқариб боради.
