«Vulverhempton» bosh murabbiy Rob Edvards bilan hamkorlik yakunlanganini rasman e’lon qildi.
Bu haqda klub matbuot xizmati ma’lum qildi.
43 yoshli mutaxassis 2025 yilning noyabr oyida jamoa boshqaruvini qabul qilib olgan edi. Biroq uning qo‘l ostida «bo‘rilar» Angliya Premyer-ligasida qolish vazifasini bajara olmadi.
Mavsum yakunlariga ko‘ra, «Vulverhempton» 38 turdan so‘ng turnir jadvalining so‘nggi pog‘onasini egallab, Chempionshipga tushib ketdi.
Angliya matbuoti Edvardsning iste’fosini kutilmagan qaror sifatida baholamoqda. Avvalroq klub rahbariyati unga jamoani qayta qurish va Premyer-ligaga qaytarish imkoniyatini berishi taxmin qilinayotgandi.
Qizig‘i, «Vulverhempton» yaqinda tarkibni kuchaytirish maqsadida tajribali himoyachi Kiran Trippier hamda hujumchi Raul Ximenes bilan shartnoma imzolagan edi.
Ma’lumot uchun, klub yaqin kunlarda yangi bosh murabbiy nomini e’lon qilishi kutilmoqda.
