Silva: «Oltin to‘p»ni Ruisga bergan bo‘lardim»

Ispaniya milliy jamoasining sobiq yarimhimoyachisi David Silva «Oltin to‘p» mukofotini hamyurti Fabian Ruisga bergan bo‘lardi.

«Men uchun jamoaviy o‘yin — eng muhimi. Chunki jamoaviy harakatsiz g‘alaba qozonib bo‘lmaydi. Agar mukofotni bir kishiga berishim kerak bo‘lganida, Fabianni tanlardim. Chunki so‘nggi ikki yil ichida u eng ko‘p sovrinlarni qo‘lga kiritdi.

U «PSJ»da va Ispaniya milliy jamoasida muhim futbolchi bo‘ldi. U yetarlicha qadrlanmayapti, nima uchunligini bilmayman, axir u — ajoyib futbolchi. Unga juda havas qilaman. U doimo soyada qolgan holda ham fantastik ishlarni amalga oshirdi.

Rodri «Oltin to‘p»ni allaqachon qo‘lga kiritgan, aks holda uni ham tilga olgan bo‘lardim», — dedi Silva El Partidazo efirida.