«Barselona» yarimhimoyachisi Dani Olmo yaqin vaqt ichida kataloniyaliklar safini tark etishni rejalashtirmayapti. Bu haqda jurnalist Florian Plettenberg xabar berdi.
Manbaga ko‘ra, ispaniyalik futbolchi jamoadagi o‘z o‘rnidan mamnun va qishki transfer oynasida boshqa klubga o‘tishni ko‘rib chiqmayapti.
Avvalroq Olmoning nomi Myunxenning «Bavariya» klubi bilan bog‘langan edi. Biroq hozirda Germaniya grandi futbolchini o‘z safiga qo‘shib olish bo‘yicha hech qanday ish olib bormayapti.
Eslatib o‘tamiz, Olmo 20 oktabr kuni Chempionlar ligasi umumiy bosqichining 3-turida «PSJ»ga qarshi o‘yinda (2:4) jarohat olgan edi. Tibbiy tekshiruvlar futbolchining chap son qismidagi yaqinlashtiruvchi mushak shikastlanganini ko‘rsatdi.
Ispaniyalik yarimhimoyachining tiklanishi taxminan bir oy davom etishi kutilmoqda.
