Jurnalist va insayder Ekrem Konurning xabar berishicha, Angliya Premer-ligasi vakillari tomonidan bo‘layotgan qiziqishlarga qaramay, Juliano Simeone Madridning «Atletiko»sidan ketish niyatida emas.
Yarimhimoyachi xizmatlariga Angliyaning «Manchester Yunayted», «Manchester Siti» va Londonning «Tottenhem» klublari qiziqish bildirmoqda va futbolchi atrofidagi vaziyatni sinchkovlik bilan kuzatib bormoqda. Diyego Simeonening o‘g‘li bo‘lgan Julianoning transfer qiymati 40 million yevroga baholanmoqda. Uning «matraschilar» bilan amaldagi shartnomasi 2030-yilning yozigacha mo‘ljallangan.
Ta’kidlash lozim, Simeonening shartnomasida tovon puli borasida maxsus band bor. Istalgan klub 500 million yevro to‘lab, futbolchini Madriddan olib ketishi mumkin.
Ma’lumot uchun, La Liga yangi mavsumida Juliano 8 ta o‘yinda maydonga tushdi va 2 ta gol urib, sheriklariga 2 marta golli uzatma yetkazib berdi.
