«Milan» futbolchilari Avstraliya va Indoneziya bo‘ylab uyushtirilgan safardan so‘ng bir necha kunlik dam olishga chiqdi. Yarimhimoyachi Luka Modrich bu kunlardan unumli foydalanib, Xorvatiyada oilasi davrasida vaqt o‘tkazdi. Kecha tunda tajribali futbolchi Milanga qaytgan va buning uchun byudjetli reysdan foydalandi.
La Gazzetta dello Sport nashrining xabar berishicha, Modrich samolyot bortida va aeroportdagi muxlislarning selfi tushish va dastxat olish haqidagi iltimoslarini rad etmagan.
Ma’lumot uchun, Luka Modrich sentyabr oyida 41 yoshni qarshi oladi. O‘tgan oyda yarimhimoyachi «Milan» bilan shartnomasini 2026/2027-yilgi mavsum oxirigacha uzaytirgandi.
