Fransiyaning «Sen-Deni» klubi himoyachisi Vanis Onsor 22 yoshida yurak faoliyatining to‘xtashi oqibatida vafot etdi. Bu haqda futbolchi tarbiyalangan «Ruan» klubi xabar berdi.
11-noyabr kuni «La Jamayk» stadionida o‘tkazilgan mashg‘ulot paytida Onsorning ahvoli yomonlashgan. Jamoadoshlari unga birinchi yordam ko‘rsatib, hayotini saqlab qolishga uringan, ammo buning imkoni bo‘lmagan.
«Vanisning to‘satdan vafot etganini chuqur qayg‘u bilan qabul qildik. U klubimizda tarbiyalangan, yoshlar va zaxira jamoalarida o‘ynagan. Oilasi va yaqinlariga samimiy hamdardlik bildiramiz», — deyiladi «Ruan» klubi bayonotida.
Ma’lumot o‘rnida, Onsor 2023/2024-yilgi mavsumda «Ruan» asosiy jamoasida 3 ta o‘yin o‘tkazib, bitta gol urgan.
Futbolchi 2026-yil yanvar oyida «Sen-Deni» safiga qo‘shilgandi. Uning vafotidan so‘ng klub «Sen-Peruaz»ga qarshi bo‘lajak uchrashuvni bekor qildi.
Muxlislar bu yangilikni Telegram’da muhokama qilmoqda
Izohlar Telegram’da ochiladi