UFC'ning yarim og'ir vazn toifasidagi sobiq chempioni Yan Blaxovich o'zbekistonlik Bogdan Guskovga qarshi jangga tayyorgarlik jarayonida jarohat olganini ma'lum qildi.
«Ayiqni otmay turib, terisini taqsimlama. Keyingi haftadayoq AQShda bo'lishim kerak edi, lekin rejalarni o'zgartirishga to'g'ri keldi. G'azabim qaynamoqda. Sparringning so'nggi raundi, noqulay vaziyat — tizzaga zarba. Menisk yirtilishi.
Reja va maqsad aniq edi, shuning uchun hafsalam pir bo'ldi. Ammo bu oxiri emas! Allaqachon iloji boricha tezroq qaytish va barchasini o'z shartlarim asosida yakunlash ustida ishlayapman», — deb yozdi Blaxovich ijtimoiy tarmoqlarda.
Blaxovich va Guskov o'rtasidagi jang 10 may kuni UFC 328 turniri doirasida bo'lib o'tishi kerak edi.
