Диогу Жотанинг ўлими билан тугаган автоҳалокат сабаблари маълум бўлди.
Аввалроқ фожиа пайшанба кунга ўтганда Испаниянинг Замора провинциясидаги шосседа содир бўлгани ҳақида хабар берилганди. Гувоҳларнинг сўзларига кўра, «Ливерпул» ва Португалия миллий жамоаси вингерининг машинаси йўлдан чиқиб кетиб, сўнг ёниб кетган.
ВВСнинг Испания фуқаролик гвардиясига таяниб хабар беришича, Жота ва унинг укаси Андре кетаётган Ламборжинининг бошқа автомобилни қувиб ўтиш чоғида шинаси ёрилган ва натижада йўлдан чиқиб кетган, кейин эса ёниб кетган.
«Бизда мавжуд бўлган маълумотларга кўра, Ламборжини йўл-транспорт ҳодисасига учраган ва қувиб ўтиш чоғида шинаси ёрилиб, йўлдан чиқиб кетган.
Воқеа бугун, соат 00:30да Замора провинциясидаги Сернадилла муниципалитетида содир бўлган.
Машина ёниб кетди ва икки йўловчи ҳалок бўлди», — деди Фуқаролик гвардияси.
Фуқаролик гвардиясидан воқеада ҳалок бўлганларнинг шахсини тасдиқлаш сўралганда: «Футболчи (Жота) ва унинг укаси Андре Силва», — деб жавоб берган.
Маълумот учун, Жотанинг укаси Андре Португалия иккинчи лигасида «Пенафиэл» клубида ўйнарди.
