ФИФАнинг глобал футболни ривожлантириш бўйича директори Арсен Венгер FIFA Forward Enterprise (FFE) лойиҳасини ишлаб чиқишда қатнашмаганини ва ушбу ташаббус бекор қилинганини қўллаб-қувватлашини билдирди.
Эслатиб ўтамиз, FFE лойиҳаси Жаҳон чемпионати ва бошқа турнирларнинг тижорий ҳуқуқларини бошқарувчи янги тузилма яратишни назарда тутган эди. Бироқ футбол конфедерацияларининг кескин танқиди ҳамда УEФАга аъзо давлатларнинг бойкот таҳдидидан сўнг ФИФА президенти Жанни Инфантино бу режадан воз кечди.
Венгернинг таъкидлашича, унинг ФИФАдаги вазифалари мутлақо бошқа йўналишларга қаратилган.
«ФИФАда мен глобал футболни ривожлантириш бўлимига раҳбарлик қиламан. Жамоамиз билан биргаликда ўйин таҳлиллари, ФИФАнинг онлайн мураббийлик маркази, 60 та мамлакатдаги футбол академиялари ҳамда ёшлар мусобақалари билан шуғулланамиз. Шунингдек, ИФАБнинг техник маслаҳатчиси сифатида фаолият юритаман.
Мен ушбу стратегик лойиҳани ишлаб чиқишда иштирок этмаганман ва бу ҳақда илк бор оммавий ахборот воситалари орқали хабар топдим», — деди Венгер.
Франциялик мутахассис лойиҳанинг бекор қилинишини тўғри қарор деб атади.
«Бу ташаббусни тўхтатиш мутлақо зарур эди. Мен ФИФА мустақил, шаффоф ва ҳалол фаолият юритиши кераклигига қатъий ишонаман», — деди Венгер.
Маълумот учун, Венгернинг ушбу баёноти Sky Sports журналисти Кавеҳ Солекол томонидан эълон қилинди.
