Чемпионлар лигаси, Европа лигаси ва Конференциялар лигасида дисквалификация тизими ўзгарди.
УEФА еврокубокларнинг умумий босқичида сариқ карточкалар жамланиши бўйича янги тартибни расман тасдиқлади.
Янги қоидаларга кўра, Чемпионлар лигаси, Европа лигаси ва Конференциялар лигасининг лига босқичида футболчилар ҳамда жамоа расмийлари тўртинчи сариқ карточкадан сўнг бир ўйинга дисквалификация қилинади. Шундан кейин эса ҳар бир жуфт карточка — олтинчи, саккизинчи ва ундан кейинги огоҳлантиришлардан сўнг яна дисквалификация қўлланилади.
Саралаш босқичларида эса амалдаги тартиб ўзгаришсиз қолади. Футболчилар учинчи сариқ карточкадан кейин, кейинчалик эса ҳар бир тоқ карточка — бешинчи, еттинчи ва ҳоказолардан сўнг ўйинни ўтказиб юборади.
УEФА ушбу ўзгаришларни 2024/25 йилги мавсумдан кучга кирган янги мусобақа формати билан изоҳлади. Чемпионлар лигаси ва Европа лигасининг лига босқичида учрашувлар сони 6 тадан 8 тага оширилгани сабабли футболчилар сариқ карточкалар туфайли тез-тез дисквалификацияга учрай бошлаган.
Шунингдек, янги тизим Конференциялар лигасида ҳам амал қилади. Гарчи ушбу турнирнинг лига босқичи 6 та ўйиндан иборат бўлса-да, УEФА қишки трансфер ойнасида футболчиларнинг турли еврокубокларда иштирок этувчи клублар ўртасида кўчиб ўтиши мумкинлигини инобатга олиб, барча мусобақалар учун ягона тартибни жорий этди.
