Валерий Карпин: «Хурсандман деб айта олмайман»

«Пахтакор» стадионида бўлиб ўтган Ўзбекистон ва Россия миллий жамоалари ўртасидаги ўйин 2:3 ҳисобида меҳмонларнинг ғалабаси билан якунланди.

Ўйиндан кейин Россия миллий жамоаси бош мураббийи Валерий Карпин иродали ғалабадан сўнг ўз фикрларини билдирди.

— Қандай ҳиссиётлар? Юз ифодангиздан жуда хурсанд эканингиз билинмаяпти.

— Ҳа, жуда хурсандман, деб айта олмайман. Балки иккинчи бўлимдан қониққандирман, лекин умуман олганда, бутун ўйинимиздан, табиийки, норозиман.

— Ижобий ҳиссиётлар кўпроқми ёки салбийлари?

— Шахсан менда барибир салбий ҳиссиётлар кўпроқ. Биринчи бўлимда кўрганларимиз биз истаган ўйиндан мутлақо йироқ эди. Танаффусда яна гаплашиб олдик, ўйин шиддатини оширдик, энергия қўшдик, деб айтайлик. Шундан кейин ҳаммаси ўз ўрнига тушди. Ўтказиб юборган голларимизга келсак, иккала голни ҳам ўзимиз ўз дарвозамизга урдик. Аммо бу биринчи бўлимдаги ўйинимиз, юмшоқ қилиб айтганда, яхши бўлмаганини ўзгартирмайди.

— Айнан нималар сизга ёқмади?

— Ҳаммаси, мутлақо ҳаммаси. Агар майдонга чиқиб, 100 фоиз тайёр ва диққатингизни жамлаган ҳолда ўйнамасангиз, ҳимоядан тўпни олиб чиқа олмайсиз, ҳужум ҳам қила олмайсиз, қайтган тўплар учун кураша олмайсиз, рақибнинг орқангизга ўтиб кетишига йўл қўясиз. Бунинг барчаси, табиийки, бош билан боғлиқ. Буни иккинчи бўлим ҳам кўрсатди: қачонки жамоа диққатини жамлаб, майдонга бор куч ва иштиёқ билан тушса, ўйин ҳам бутунлай бошқача бўлади.

— Бу рақибни менсимаслик оқибати бўлдими?

— Буни футболчиларнинг ўзидан сўраганингиз маъқул.

— Виталий Денисов студиядаги эфирда ўйиндан олдин Ўзбекистон фаворит эканини айтди. Сиз ҳам бу учрашувга шундай кайфиятда тайёргарлик кўрдингизми?

— Ҳа, эҳтимол, шундай. Табиийки, биз ким фаворит, ким фаворит эмаслиги ҳақида гапирмаймиз. Бу ҳақда кўпроқ мухлислар ва мутахассислар фикр билдиришади. Биз бу мавзуни муҳокама қилмадик, лекин жуда жиддий ва оғир ўйин бўлишини тушунардик. Жаҳон чемпионатида иштирок этган ва ФИФА рейтингида юқори ўринларда турган жамоага қарши майдонга тушаётганимизни билардик. Яъни, бу қандайдир Намибия эмас, балки Эрон ёки Нигерияга қарши ўйинлар каби жиддий учрашув бўлишини англаб етгандик.

— Тўрт йил аввалги Ўзбекистон ва бугунги Ўзбекистон ўртасидаги фарқ сезиляптими?

— Менинг назаримда, бу бошқа жамоа. Ўйлашимча, Ўзбекистон терма жамоаси кучайган. Бошқа томондан, Россия терма жамоаси ҳам 2022 йилга нисбатан сўнгги тўрт йил ичида кучайди, деб ҳисоблайман. Гап натижада эмас, бугун биз мағлуб бўлишимиз ҳам мумкин эди. Масала бунда эмас. Менинг хулосаларим фақат бугунги ўйинга асосланмаган, — деди Россия миллий жамоаси бош мураббийи.