УЕФА, ОФК ва КОНКАКАФ FIFA фаолиятини текширмоқчи

УЕФА, ОФК ва КОНКАКАФ FIFA президенти Жанни Инфантинонинг Жаҳон чемпионати ҳуқуқларининг бир қисмини сотиш таклифидан сўнг ташкилот фаолиятини мустақил текширишга чақирди. Бу ҳақда The Independent нашри хабар берди.

Уч конфедерация футбол жамоатчилигига очиқ мактуб йўллаб, FIFA’даги сўнгги воқеалар юзасидан хавотир билдирган.

«Ҳурматли футбол оиласи! Футбол дунёдаги энг буюк умумий эҳтиросдир. У бирор шахс ёки ташкилотга тегишли эмас. У футболчилар, мухлислар, клублар, аъзо ассоциациялар ва келажаги ишониб топширилган ҳар бир муассасага тегишли. Гап пулда эмас. Конфедерациялар аллақачон FIFA’нинг улкан захираларидан масъулиятли фойдаланишга ва аъзо ассоциацияларни ривожлантиришга инвестицияларни янада кучайтиришга чақирган.

Гап мусобақаларни кенгайтириш, жаҳон чемпионати маблағларини тақсимлаш ёки бошқа жамоавий қарорларни қайта кўриб чиқиш ҳақида эмас. Бу қарорлар биргаликда қабул қилинган ва улар ўз кучида қолиши керак. Гап янада фундаментал нарса – футболнинг яхлитлиги ва уни бошқариш учун сайланганларнинг ҳалоллиги ҳақида. Масъулият бўлиши керак бўлган жойда сукут ҳукмронлик қилмоқда, очиқлик бўлиши керак бўлган жойда эса масофа бор. Бу футбол ўз раҳбариятидан кутадиган фазилатлар эмас», - дейилади мактубда.

Мактубни UEFA президенти Александр Чеферин, КОНКАКАФ президенти Виктор Монталяни, ОФК президенти Салмон бин Иброҳим Ал Халифа, шунингдек, UEFA бош котиби Теодор Теодоридис, КОНКАКАФ бош котиби Филипп Можо ва ОФК бош котиби Датук Сери Виндзор Жон имзолаган.