«Атлетико» ҳужумчиси Хулиан Алварес Жаҳон чемпионатидан кейинги таътилини якунлаб, душанба куни жамоа ихтиёрига қайтди. Аргентиналик футболчи Махадаондаги клуб базасига бормади ва машғулотларга қайтишдан олдин бошқа тиббий марказда жисмоний ҳамда тиббий текширувлардан ўтди. Бу ҳақда Испаниянинг «AS» нашри хабар бермоқда.
Алварес билан бир қаторда Маркос Ллоренте, Анхел Корреа ва Хуан Муссо ҳам тиббий кўрикдан ўтган. Тўрт футболчи Мадриддаги юқори натижаларга эришувчи спорт тиббиёти марказида жисмоний тестлар ва юклама синовларини топширди.
Аргентиналик ҳужумчининг «Атлетико»га қайтиши алоҳида қизиқиш уйғотмоқда. Бунга унинг Жаҳон чемпионати давомида клубдаги келажаги ҳақида айтган гаплари ҳам сабаб бўлди. Алварес 22 июнь куни Австрия устидан қозонилган ғалабадан кейин орзусини амалга оширишни исташини билдирган ва бунинг учун клубни тарк этиш вариантини ҳам истисно қилмаган эди.
Ўша даврда «Барселона» аргентиналик ҳужумчига қизиқиш билдираётган клублардан бири сифатида тилга олинган. Шу сабабли трансфер бозори давомида Алвареснинг «Атлетико»да қолиши борасида турли тахминлар пайдо бўлди.
Энди футболчининг Мадридга қайтиши билан унинг биринчи баёнотлари ва машғулотлардаги муносабатига эътибор кучаяди. Алвареснинг «Чоло» лақабли Диего Симеоне билан учрашуви чоршанба кунига режалаштирилган. Айни куни Жанубий Кореянинг Сеул шаҳридаги йиғинда иштирок этган футболчилар ҳам жамоавий машғулотларга қайтиши кутилмоқда.
«Атлетико» халқаро майдонда иштирок этган футболчиларни босқичма-босқич жамоага қўшиш режасини ишлаб чиққан. Грималдо, Пубиль ва Хулиано Симеоне каби футболчилар таътилни эртароқ якунлаб, бир неча кундан бери жамоа билан шуғулланмоқда. Алварес, Ллоренте, Баэна ва Муссо эса таътилдан кейин бугун тиббий текширувдан ўтди.
Шу кунларда мадридликлар футболчиларни бир нечта гуруҳга ажратган ҳолда машғулот ўтказмоқда. Мақсад — халқаро мусобақалардан қайтган футболчиларнинг жисмоний ҳолатини босқичма-босқич тиклаш ва мавсум бошланиши олдидан юкламаларни мослаштириш.
